ФАКТ! "Металлург" Намангандаги 23 ўйинда фақатгина бир марта "Навбаҳор"ни мағлуб этган холос

Coca Cola Суперлига 19-тури доирасида "Навбаҳор" ўз майдонида “Металлург” клубини қабул қилади. Наманганликлар матбуот хизмати учрашувга оид маълумотларни тақдим этди.

Мазкур жамоалар Суперлига (Олий лига)да шу кунгача 47 маротаба ўзаро рўбарў келган. Ўтказилган ўйинларнинг 21 тасида “лочинлар” ғалаба қозонган, 13 учрашувда бекободликлар зафар қучган, 13 баҳсда жамоалар дурангга имзо чеккан. Тўплар нисбатидаги устунлик "Навбаҳор" томонида: 68га 48.

Ўзаро ўйинларда наманганликлар 76 очко, бекободликлар 52 очкони қўлга киритган. “Навбаҳор”нинг “Металлург” устидан қозонган энг йирик ғалабаси 7:0га тенг бўлса, бекободликларнинг энг йирик ғалабаси – 5:1.

Наманганда шу кунга қадар ўтказилган учрашувларда “Навбаҳор” рақибга деярли имконият бермаган. 23 ўйиннинг 17 тасида мезбонлар ғалаба қозонган, 5 беллашувда дуранг қайд этилган. Фақатгина 1 марта, яъни 2016 йили бекободликлар зафар қучган.

Ушбу клубларнинг 1-даврада Бекободда бўлиб ўтган учрашувида “лочинлар” Азизбек Турғунбоевнинг дубли ва Руслан Боловнинг голи эвазига 3:1 ҳисобида ғалаба қозонганди.

“Навбаҳор” – “Металлург” баҳси бугун Наманган шаҳридаги “Марказий” ўйингоҳда соат 18:00да старт олади.

Фикрлар

Фикр қолдириш учун авторизациядан ўтинг!