ФАКТ! “Сурхон” сафарда “Навбаҳор”га қарши ўйинларда очко ололмаган

Coca Cola Суперлигасининг 10-тур доирасида Наманганнинг “Навбаҳор” клуби Термизнинг “Сурхон” жамоасини қабул қилади. "Навбаҳор" клуби матбуот хизмати ўйин олдидан жамоаларга оид маълумотларни тақдим этди.

Мазкур клублар шу кунгача миллий чемпионатларимиз тарихида ўзаро 26 марта рўбарў келишган. Ушбу ўйинларнинг 18 тасида “лочинлар”нинг қўли баланд келган бўлса (битта ўйинда “Навбаҳор”га техник ғалаба ёзилган), 5та учрашувда термизликлар ғалаба қозонишган, 3та баҳсда эса жамоалар муроса кўчасини танлашган. Тўплар нисбати – 73-20, “Навбаҳор” фойдасига.

Ўзаро учрашувларда “Навбаҳор” 57 очкони, “Сурхон” эса 18 очкони қўлга киритган. Ушбу жамоалар ўртасидаги ўйинлардаги энг йирик - 9:0 ҳисоби 1997 йили Наманганда қайд этилган. Таъкидлаш жоизки, наманганликлар ўтказилган 26та баҳснинг 12 тасида термизликлар устидан йирик ҳисобда зафар қучишган.

“Навбаҳор” ҳамда “Сурхон” клублари бунгача Наманганда 13 марта куч синашишган (ўтган йилги баҳс маълум сабабларга кўра, Фарғонада ўтказилган ва ушбу ўйин ҳам “Навбаҳор” номинал мезбон бўлганлиги боис, инобатга олинди).

1992 йили термизликлар Наманганга ташриф буюришмагани боис, “Навбаҳор”га 3:0 ҳисобидаги техник ғалаба ёзилган бўлса, қолган 12та баҳснинг барчасида “лочинлар” ғалаба қозонишган (Фарғонадаги ўйинда ҳам). Термизликлар Наманганда ҳали очко олишолмаган.

“Навбаҳор” ўз майдонида ўтказилган ўзаро учрашувларда “Сурхон” дарвозасини 49 марта ишғол этган бўлса, термизликлар Наманганда “лочинлар” дарвозасига бор-йўғи 4та тўп киритишган.