Фаластин бош мураббийи: Эртага ғалаба қозонсак, кейинги босқичга чиқиш имкониятини сақлаб қоламиз

Хабарингиз бор, эртага Ўзбекистон миллий терма жамоаси ЖЧ-2022 иккинчи саралаш босқичидан ўрин олган Фаластинга қарши ўйин ўтказади. Ушбу беллашув олдидан бугун икки жамоа мураббийлари ўртасида матбуот анжумани ўтказилди. Унда меҳмонлар устози Нуриддин Оулд Али иштирок этди.

- Эртанги учрашув икки жамоа учун ҳам жуда муҳим. Икки жамоа ҳам олдинги турдаги мағлубиятни унитишга ҳаракат қилади. Эртага 2 жамоа ҳам ғалаба учун майдонга тушади ва жамоалар кейинги босқичга ўтишга интилади. Лекин ўйин қийин ўтади.

Ўзбекистон миллий терма жамоаси жуда кучли. Биринчи ўйинда ғалаба қозонганмиз. Энди ҳам рақибнинг кучлилигини билган ҳолда 3 очкони қўлга киритишга интиламиз. Шунинг учун эртага ҳақиқий жанг бўлади деб ўйлайман.

Ўзбекистон терма жамоаси уйда ўйнаши устунлик беради. Уларда мураббий алмашди, лекин футболчилар ўша-ўша. Ҳозирги кунда ҳамма терма жамоа бир-бири ҳақида маълумотга эга. Ниманидир яшириш қийин. Бўлажак рақибимизнинг энг кучли жиҳатлари ва футболчиларини яхши биламиз. Ўзимиз эртага охирги учрашувимиздан-да яхшироқ ўйин намойиш этишга уринамиз. Эртанги мақсадимиз фақат 3 очко. Шундагина кейинги босқичга чиқиш имкониятини сақлаб қоламиз. 

Табиий майдонда ўйнаш бўйича ҳеч қандай муаммо йўқ. Майдоннинг ҳолати яхши бўлса биз тайёрмиз. Эртанги ўйинга ҳар томонлама тайёр бўлишимиз лозим. 

Айни пайтда биз Ўзбекистон миллий терма жамоаси билан бир хил ҳолатдамиз. Шунинг учун бизни эртага фақат ғалаба қониқтиради. Лекин рақибимиз кучлилиги учун эртага 3 очкони жамғаришимиз қийин бўлади.

Биз Ўзбекистонга эртароқ келдик. Чунки об-ҳавога кўникиш учун. Машғулотлар ўтказдик. Шунинг учун об-ҳаво муаммо бўлмайди, - деди мураббий.