Фарҳод Бекмуратов: "Локомотив"нинг олдинги мавқеини қайтаришимиз керак"

Про лигага равона бўлган Тошкентнинг “Локомотив” клуби янги мавсум учун таркибини сезиларли даражада кучайтиряпти.

Жамоа Суперлигага қайтиш учун про лигадан янада кучли жамоага айланмоқчи. Тажрибали ярим ҳимоячи Фарҳод Бекмуратов ҳам янги мавсумни “Локо”да бошлайди. "Андижон"да тўп сурган Фарҳод 2025 йилда клубини ўзгартирди.

У 2018 ва 2019 йиллари ҳам “Темирйўлчилар” таркибида тўп сурган ва яна собиқ жамоасига қайтди.

- Фарҳоджон янги мавсумни "Локомотив"да бошлашга қарор қилдингиз. Аввало, ушбу таклифни қабул қилишингизда асосий сабаб нима бўлди?

-  Олдимда 2-3 та таклифлар бўлишига қарамасдан, “Локомотив”ни танладим. Чунки Тўлабек Акрамов қўнғироқ қилди ва музокаралар олиб бордик. Самвел Вячеславович сизни сўраяпти, жамоамизга келиб ёрдам беришингизни истаяпмиз деди. Натижада фаолиятимни “Локомотив”да давом эттиришга қарор қилдим.

- Маълумки, сиз илгари ҳам ушбу клубда тўп сургансиз. У ерга қайтганингизда нимани эсладингиз?

- Ҳа, тўғри айтдингиз. Илгари бу клубда ўйнаганман. Бу ерда ҳамма таниш. Клубда меҳнат қилаётганлар ҳозир ҳам шу ердалар. Уларни кўриб хурсанд бўлдим ва улар ҳам мени кўриб хурсанд бўлишди.

- Таркиб кучайтириляпти. Янги футболчилар билан мослашув қандай кечмоқда ва жамоа сизларни қандай қабул қилди?

- Таркиб кучайтириляпти. Мослашиш яхши кечяпти. Ҳаммамиз футболни ичидаги одамлармиз ва бир-биримизни яхши таниймиз. Янги легионерлар келяпти. Улар билан ҳам чиқишиб кетдик.  

- Хизматингизга яна қандай қизиқишлар бўлганди?

- Суперлигага чиққан ва Суперлигада ўйнаб турган клублар алоқага чиқишганди. Уйдагилар билан маслаҳатлашган ҳолда энг яхшиси “Локомотив” дея ўйладик ва шу қарорга келдик.

- Самвел Бабаян билан ишлаш қандай кечяпти ва у кўпроқ нимага эътибор қаратади?

- Самвел Вячеславович билан ишлаш албатта яхши. Талабчан, қаттиққўл, тартиб-интизомга эътибор беради. Ҳаммамизга тушунтиряптики, “Локомотив”ни олдинги мавқеини қайтаришимиз керак. Шунга асосан машғулотларда қаттиқ ишлаяпмиз.

Шуҳратбек Жўраев.