Файзуллаев: “Барселона”да ўйнамоқчиман!
Аббосбек Файзуллаев Россия Премьер-лигасида яна тур қаҳрамонларидан бўлди. ЦСКА футболчилари ўз мухлислари кўз ўнгида Москванинг “Динамо” жамоасини қабул қилган учрашувда легионеримиз гол ва ассист қайд этди.
Ушбу баҳсда “армиячилар” 2:3 ҳисобида мағлубиятга учради. Бироқ энг яхши ўйинчилардан бўлган Аббосбек Файзуллаев россиялик журналистларга нишон бўлди ва уларнинг бир неча саволларига жавоб берди.
— “Динамо” билан очиқ ўйин бўлди. Ҳар икки жамоа томонидан жуда кўп ҳужумлар уюштирилди. Биз ўз устимизда кўпроқ ишлашимиз керак.
“Динамо” жуда яхши жамоа. Футболчилари индивидуал жиҳатдан анча кучли.
Биз ҳар бир учрашувда ғалаба учун ўйнаймиз.
— Ўйин охирида ЦСКАнинг ўйини пасайиши нима билан боғлиқ?
— Ҳеч нарса билан боғлиқ эмас. Ўйинда ютар экансан, ҳисобни ушлаб қолишинг керак. Катта куч билан ҳужумга ўтиб, ҳимоя чизиғида рақибга катта ҳудудларни бериб қўйиш ярамайди.
— Ўйин охиридаги пасайишларни консентрация билан боғлаш мумкинми?
— Биз ҳимояланиш борасида кўпроқ ишлашимиз керак. Ҳимоя эса, ҳужум чизиғидан бошланади.
— Ўз самарадорлигингдан қониқяпсанми?
— Мен, энг аввало, жамоам ғалаба қозонишини истайман.
— Келажакда қайси жамоада ўйнашни истайсан?
— “Барселона”да.
.jpg?1701001205066)
Таъкидлаш жоизки, Аббосбек Файзуллаев аввалги интервьюларида мақсади Европанинг энг кучли лигаларида ўйнаш эканини таъкидлаган.
20 ёшли футболчимиз болалигидан “Барселона” ва Лионель Мессининг мухлиси экани, келажакда “Камп Ноу”да ўйнашни орзу қилишини ҳам яширмаган эди. Бундан ташқари, Аббосбек ўзини Лионель Мессига қиёслашларига ҳам муносабат билдирди.
“Пахтакор” тарбияланувчиси бўлган Аббосбек Файзуллаев профессионал фаолияти давомида Ўзбекистон Суперлигаси, мамлакат кубоги, Осиё Чемпионлар лигаси, Россия Премьер-лигаси ва кубоги мусобақаларида жами 56 маротаба майдонга тушиб, ўз ҳисобига ўн иккита гол ва ўнта ассист расмийлаштирган.
Ўзбекистон миллий терма жамоасида Файзуллаев еттита ўйинда қатнашган ва ўз ҳисобига битта гол ёздириб қўйган.
Файзуллаевнинг ЦСКА билан амалдаги шартномаси 2026 йилнинг 30 июнигача тузилган. Томонлар ўзаро келишган ҳолда ҳамкорликни яна бир йилга узайтириши мумкин.
Фикрлар