Легионеримиз: Асосий таркибда ўйнашга тайёрлигимни исботлайман

Россия Премьер-лигасидаги легионерларимиздан бири – “Рубин” шарафини ҳимоя қилаётган Рустам Ашурматов metaratings.ru сайтига интервью берди.

27 ёшли футболчимиз 2023 йилнинг бошидан бери “Рубин” жамоасида тўп тепяпти. Ўзбекистон миллий терма жамоаси аъзоси бўлган марказий ҳимоячи фаолияти давомида юртимиздан ташқари, маълум муддат Жанубий Кореянинг икки клубида ҳам ўйнаган.

Sports.uz портали ўзбек футболи ишқибозлари эътиборига Рустам Ашурматовнинг интервьюсини ҳавола этади.

– Рустам, сен бир йилга яқин Россияда ўйнаяпсан. Бу мамлакатга тез кўникдингми?

– Жуда осон кўникдим. Чунки Қозон шағридаги ҳаётим Ўзбекистондаги ҳамма нарсани эсга солади. Татарлар ошхонаси худди бизникига ўхшайди. Маданияти ҳам яқин. Тилимизда ҳам ўхшашлик кўп.

Агар суҳбатдошим татар тилида хотиржам гапирса, унинг барча фикрларини тушуна оламан. Оилам учун ҳам Қозонда яшаш қулай. Бу жуда чиройли ва қулай шаҳар.

– Сен жамоа биринчи лигада ўйнаётганида келган эдинг. “Рубин” юқори дивизионга кўтарилишига аминмидинг?

– Жамоа Россия Премьер-лигасига чиқишига бир фоиз ҳам шубҳаланганим йўқ. Жамоа бунинг учун ҳамма нарса қилди, мендан умумий ғалабами учун бор кучимни бердим. “Рубин” мен ҳали келмасимдан биринчи турда кўп очко йўқотган эди.

– “Рубин” бу мавсумни ҳам оғир бошлади. Чемпионат ярмига келиб, сизлар саккизинчи ўриндасизлар. Бу натижа қониқтирадими?

– Биз юқорироқда бўлишимиз мумкин эди. Жамоа Премьер-лигага мослашишига вақт кетиб қолди. Бу лигада тезлик бошқача ва рақибларнинг ҳам савияси юқори.

Дастлабки учрашувлар қийин ўтди. Кейинчалик ўз даражамизга кўтарилиб олдик. Айрим вазиятларда бизга омад ҳам етишмади. Шундай экан, саккизинчи ўрин ҳам – биринчи даврнинг адолатли натижаси.

Биз олдинда чемпионатнинг тенг ярми борлигини ва ўйинимизни кучайтириш кераклигини тушуниб турибмиз. “Рубин” юқори ўринлар учун курашадиган катта клуб.  Шунга интилиш лозим.

– Сен кўп ўйнаётганинг йўқ. Рашид Раҳимов сени асосан Россия кубогида ўйнатяпти. “Рубин” бу мусобақани тарк этди. Сенга бу қандай таъсир қилди?

–  Ҳар қандай футболчига кўп ўйнай олмаётгани алам қилади. Мен кўпроқ ўйнашни истайман, бунинг учун машғулотларда бор кучим билан ҳаракат қиляпман. Ўз вақтим келишини кутишим керак. Шундай имконият туғилса, бор имкониятимни кўрсатаман, ҳар доим асосий таркибда ўйнашга тайёрлигинимни исботлайман.

– Ҳар доим ҳам таркибдан жой топиб бермаётган бош мураббий Рашид Раҳимов билан муносабатинг қандай?

– Муносабатлар яхши. Тил топишимиз осон, характерлар ўхшаш. Тожик ва ўзбек тиллари бир бирига ўхшамайди. Лекин мураббий ўзбекча сўзларни билади. Лекин бу муҳим эмас, иккимиз ҳам русча гаплашамиз. Аммо мураббийнинг сенинг она тилингда саломлашиши ва ҳол-аҳвол сўраши ёқимли бўлади. Рашид Маматкулович жуда кўп тилларни билади. Жамоада ҳамма билан мулоқот қилади.

– Унга қандай таъриф берасан?

– У қаттиққўл ва талабчан мураббий. Мен Ўзбекистонда ва Жанубий Кореяда кўп мутахассислар билан ишлаганман. Раҳимов улардан кескин фарқ қилади. Унинг характери ва машғулотлар жараёнига ёндашувини алоҳида таъкидлай лозим.

“Кальяри”да катта йўқотишлар. Раньери Шомуродовни интизорлик билан кутяпти!

Россияда ўзбек футболчилари сони янада кўпаяди