Файзуллаев Европада ўйнашга тайёрми?
Россия премьер-лигасининг биринчи даврасида асосий кашфиёт сифатида эътироф этилган Аббосбек Файзуллаевнинг келажаги энг кўп муҳокама қилинаётган мавзулардан бирига айланган.
Дарҳақиқат, кейинги йилларда Россия чемпионатида Аббосдек бирданига порлаган футболчимиз бўлмаган. Ҳатто, Элдор Шомуродов ҳам "Ростов"да ўйнаган кезлари Россия Премьер-лигасига мослашиб, ўз салоҳиятини намойиш этгунича бир мунча кўп вақт сарфлаган.
Августда “Пахтакор”дан ЦСКага кўчиб ўтган Файзуллаев нималарга қодирлигини исботлаши учун атиги учта учрашув керак бўлди холос. Дастлаб, иккита баҳсда бир неча дақиқадан ўйнаган легионеримиз “Крилья Советов” билан бўлган баҳсда иккинчи бўлимда майдонга тушиб, жамоасини аламли мағлубиятдан қутқариб қолди.
Шундан бери Аббос ЦСКАнинг ҳужум чизиғидаги асосий фигурасига айланган. Деярли барча ҳужумлар Файзуллаев орқали ўтади.
Ҳозир Россия футболи экспертлари ва мураббийлар Аббосбек Файзуллаевнинг Европада ўйнай олиш салоҳиятини муҳокама қиляпти.
ЦСКА ва Россия миллий терма жамоаси собиқ футболчиси Евгений Алдонин ўзбек легионерининг хорижда ўйнаш имкониятига баҳо берди.
- Файзуллаев ЦСКАнинг ҳам, чемпионатимизнинг ҳам асосий кашфиёти бўлди. У футболимизга чақмоқдек кириб келди. Унинг ўйинларини кузатиш зав бағишлаяпти. Аббосбек ҳужум учун ўйнайди ва вазиятни кескинлаштиради.
Аббосбекнинг ёшини инобатга олсак, аслида уни келажак учун трансфер қилишган эди. Бироқ у дарров ўзини кўрсата олди ва ўзидан жуда яхши таассурот қолдирмоқда.
Кўпчилик экспертлар Файзуллаев ҳозирнинг ўзида хорижнинг кучли чемпионатларидан бирига ўтишга тайёрлигини таъкидлаяпти. Лекин ўйинчининг фақат Россия Премьер-лигасидаги ўйинларига қараб баҳо бериш жуда қийин.
Агар ЦСКА Еврокубокларда иштирок этганида ва Файзуллаев халқаро майдонда ҳам ўзини кўрсата олганида, қатъий ишонч билан уни Европада ўйнашга тайёр, десак бўларди. Ҳозирча эса, унинг қайси жамоага ўтиши мумкинлиги ва қайси клуб ўйинини кучайтира олишини тасаввур қилиш қийинроқ. Буни ҳаммасини амалда кўриш керак.
Баъзилар Хвича Кварацхелия трансферига қараб, Аббос ҳам кучли чемпионатда ўйнаб кета олишини айтиши мумкин. Лекин Аббос эндигина 20 ёшга тўлганини, ҳозир ЦСКА ҳужум чизиғида етакчи эканини инобатга олиб, Россияда қолиши ва тажриба ошириши лозимлиги, кейинчалик Европанинг кучли клубига ўтиши мантиқан тўғрироқ бўлади.
Табиийки, Аббос унинг фаолияти бир лойиҳа эканини ва уни ривожлантириб бориш кераклигини яхши тушунади. Ҳозирча у мураккаб ва етарли даражада кучли чемпионатда ЦСКА шарафини муносиб ҳимоя қиляпти.
Файзуллаевнинг трансфер суммаси ҳақида гапирсак, уни аниқ белгилаш қийин. Албатта, ҳозир у ёздагидан бир неча баравар қимматлаган. Бундан ташқари, кетаётгандаги таваккални унутмаслик керак. Чунки чемпионатимиздан кетганларнинг ҳаммаси ҳам Европада ўйнаб кета олмади. Бунга Миранчук ва Захарянни мисол қилиш мумкин. Бу ёшда шошиш ярамайди. Мунтазам ўйнаш ва ўйин амалиётига эга бўлиш жуда муҳим. Агар ўйин амалиёти бўлмаса, ўсиш ҳам тўхтайди, - деди Евгений Алдонин.
ЦСКА Россия Премьер-лигасидаги навбатдаги учрашувини 25 ноябрь куни ўтказади. “Армиячилар” 16-тур доирасида “Динамо” футболчиларини ўз майдонида қабул қилади.
Фикрлар