Файзуллаев Европадан яхши таклифни рад этмайди!
Аббосбек Файзуллаев Россия Премьер-лигасидаги фаолиятини эқинда бошлаганига қарамай, кетма-кет икки марта ЦСКА футболчилар ўртасида сентябрь ва октябрь ойларининг энг яхши ўйинчиси, деб топилди.
Легионеримиз мухлислар ўртасида ўтказилган сўровномаларда катта фарқ билан ғалаба қозонганини алоҳида эътироф этиш керак.
20 ёшли ҳужумкор футболчимиз ўйинини мухлису мутахассислар, футболчилар, мураббийлар баҳолаб бормоқда.
Sports.uz портали ўзбекистонлик футбол ишқибозлари эътиборига Файзуллаев ҳақидаги фикр-мулоҳазаларни ҳавола қилишда давом этади.
Мойзес, ЦСКА ҳимоячиси:
- Аббосбек – биз учун муҳим ўйинчи. У жуда ақлли, тезкор футболчи. Файзуллаев голлари ва ассистлари билан жамоага ёрдам беряпти.
Мен Файзуллаевни ёрқин келажак кутаётганига аминман, - деди бразилиялик легиорер.
Евгений Алдонин, ЦСКА собиқ футболчиси:
- Файзуллаев трансфери ЦСКА учун энг ёқимли сюрприз бўлди. Улар бу ўйинчини келажакни кўзлаб олиб келган. Аббос энди 20 га тўлди. Файзуллаев бўй-басти жиҳатидан жисмоний кўрсаткичлари камтарроқ бўлиши мумкин, лекин кейинги пайтда намойиш қилаётган ўйини юқори даражада.
Аббос “армиячилар”нинг ҳужум чизиғини ўзгартириб юборди. У тезкор, моҳир, гавдасининг кичиклигига қарамасдан, яккакурашларда ғолиб чиқяпти, ҳар гал тўпга биринчи етиб келяпти.
Файзуллаевнинг тўп билан ишлаш маҳоратини алоҳида таъкидлаш керак. У ҳамма ишни катта тезликда бажаряпти, ўйинни кескинлаштиришга уста экан. Энг муҳими, бу футболчи қизғанчиқ эмас, ўзи гол уриши ёки жамоадошига тўп узатиши мумкин. Бир сўз билан айтганда жамоавий ўйинчи.
Менимча, ҳозир Аббос ЦСКАнинг энг зўр футболчиси. У янада ўсишини истайман. Файзуллаевнинг салоҳияти катта эканига ишончим комил. Ҳозир ажойиб ўйин намойиш қиляпти, аммо бу билан тўхтамаслиги керак.
Файзуллаев қишда Европага кетиши мумкинми? Бу унинг қўлида қандай таклифлар борлигига боғлиқ масала. Агар футболчининг ўзи ва агенти ЦСКАни Европага кетиш учун трамплин, деб билса, ҳозир ҳеч ким кучли лигалардан келадиган яхши таклифни рад этмайди. Чунки Аббосбек ҳам фаолиятини ривожлантиришни истайди. У ЦСКа учун жуда муҳим ўйинчига айланиб бўлди, - деди собиқ футболчи.
Валерий Газзаев, таниқли мураббий:
- Кейинги ўйинларда Аббос Файзуллаев яққол ажралиб турибди. Бу футболчи кун сари эмас, балки соат сайин ўсяпти. Агар шу тақлид меҳнат қилишда давом этса, келажаги порлоқ бўлади.
Файзуллаевнинг салоҳияти қандай? Уни ортиқча мақташдан йироқман. Лекин бор гап шу: Аббоснинг ақли ва оёғи тез ишлайди. У бир зумда қарор қабул қилади, тез югуриб ҳам аниқ ва нозик пас бера олади. Бу жуда қимматли сифатлар. Файзуллаев ўзига нисбатан талабчанликни янада ошириши ва функционал тайёргарлик устида ишлаши керак, - деди Россиянинг энг машҳур мураббийларидан ҳисобланган Валерий Газзаев.
Фикрлар