Файзуллаев отлан, Европага кетадиган пайт келди!
Аббосбек Файзуллаев индивидуал совринларни йиғишда давом этмоқда. Яқинда Осиёнинг 2024 йилдаги энг яхши ёш футболчиси бўлган легионеримиз эди Ўзбекистонда энг яхши футболчига аталган совринни қўлга киритди.
21 ёшли ҳужумкор футболчимиз мамлакатимиз миқёсидаги ушбу нуфузли совринга кетма-кет иккинчи бор эга чиқди.
Россия ва Ўзбекистон футбол экспертлари Аббосбек Файзуллаевнинг ютуқларига муносабат ва фаолиятини Европада давом эттириши бўйича фикрларини билдириб ўтди.
Дмитрий Хамуха, ЦСКА ва Россия терма жамоаси собиқ футболчиси:
- Аббосбек Файзуллаевнинг йилнинг энг яхши футболиси номинацияда ғолиб чиққани унинг Ўзбекистон миллий терма жамоаси сафида ўзини яхши кўрата олаётгани билан боғлиқ. Шунингдек, у Париждаги Олимпия ўйинларида ҳам, бизнинг Премьер-лигамизда ҳам яхши ўйнаб келди.
Бу муваффақиятларда унинг иқтидорини очиб берган ЦСКА жамоасининг ҳам ҳиссаси борлиги шубҳасиз. Файзуллаев Россияда ёрқин даражада порлади.
Аббос чемпионатни юқори даражада якунлаши, ўзининг энг яхши ҳислатларини намойиш қилиши лозим. Шунда унга Европадан яхши таклифлар бўлади. Қишда ЦСКАдан кетишининг эҳтимоли кам. Бироқ агар ЦСКАни қониқтирадиган яхши таклиф тушса, бу трансфер қишда ҳам юз бериши мумкин. Лекин менимча, Файзуллаев жамоани ёзда, чемпионат якунланганидан кейин тарк этади.
Жаъфар Ирисметов, “Спартак Москва” ва Ўзбекистон терма жамоаси собиқ футболчиси:
- Аббос икк йилдан бери юқори савияда ўйнаяпти ва бу совринларнинг ҳаммаси муносиб тарзда қўлга киритилди. “Ланс”да ўйнаётган Абдуқодир Ҳусанов ҳам бор. Афсуски, бир совринни иккига бўлиб бериб бўлмайди. Бу борада совринлар кўпроқ ҳужумкор футболчиларга насиб қилади.
Уларнинг ҳар иккиси ҳам ҳали ёш ва ҳали кўп бор мамлакатнинг энг яхши футболчиси номини бўлишиб олади.
Аббоснинг ўзига келсак, у ЦСКАнинг натижаларига таъсир ўтказадиган даражада етган, айниқса, жамоа ўйинлари қовушмаётган паллада, ғалабаларга жуда катта ҳисса қўшиб келмоқда. Энди олдинга қадам ташлайдиган ва Европани забт этадиган пайт келди.
Аббосбек Файзуллаев “Пахтакор” тарбияланувчиси ҳисобланади. 21 ёшли легионерга Франциянинг “Монако” ва Испаниянинг “Реал Сосьедад” каби клубларидан жиддий қизиқиш бўляпти.
Трансферларга ихтисослашган Transfermarkt портали экспертлари Аббосбек Файзуллаевнинг трансфер суммасини 8 миллион евро миқдорида баҳоламоқда.
Фикрлар