Файзуллаев – катта йўқотиш!
Аббосбек Файзуллаев Европа топ-лигаларида ўйнаётган Испаниянинг “Реал Сосьедад” ва Франциянинг “Монако” клубларидан жиддий қизиқиш бўлаётгани, бу жамоалар 21 ёшли ҳужумкор футболчимизни қишки трансферлар вақтида ўз сафига қўшиб олишни режалаштираётгани ҳақида маълумотлар тарқатилмоқда.
Россия оммавий ахборот воситалари мамлакатнинг таниқли футбол экспертларидан ЦСКА футболчисининг трансферига муносабат сўраб, интервью оляпти.
Sports.uz портали Россия терма жамоасининг собиқ футболчиси, айни пайтда таниқли эксперт ҳисобланган Евгений Алдониннинг Аббосбек Файзуллаев хусусида euro-football.ru манбасига берган интервьюсини ҳавола этади.
- “Монако” Аббосбек Файзуллаевга қизиқаяпти, деган янгилик тарқалди. Сиз бунга ишонасизми?
- Бўлиши мумкин. Аббос Осиёнинг энг яхши ёш футболчиси ҳисобланади ва бу нимадандир далолат беради. Унинг истиқболи бор, ёши ҳам шунга мос. Ўтган мавсумда ҳам у ўз даражасини кўрсатган эди, бу гал ҳам шундай давом этмоқда.
Шунинг учун нега “Монако” унга қизиқмаслиги керак? Бу жамоа Франциянинг биринчи ёки иккинчи рақамли жамоаси эмасдир, лекин Европа Чемпионлар лигасида мунтазам иштирок этиб келади. Шу боис бу истиқболли трансфер ҳисобланади.
- Файзуллаев “Монако” каби жамоалар даражасига тортадими?
- Олдиндан дарров мослашиб кетиши борасида бирор нима дейиш қийин, лекин вақти келиб, албатта ўйнаб кета олади. Франция чемпионати атлетика ва тезкорликка таянишини инобатга олиш керак. Бу трансфер ёш футболчи учун янги ва яхши синов бўлади.
Бу ерда яна бир муҳим жиҳат, трансфер нархига боғлиқ. У ЦСКАни қониқтириши керак.
- Оммавий ахборот воситаларида “Монако” Файзуллаев учун ЦСКАга 15 миллион евро беришга тайёр экани айтилди. Бу муносиб нархми?
- Бу яхши нарх. Бу ерда ЦСКА Файзуллаевни қанча нархга олганини инобатга олиш керак. Бу борада аниқ маълумотларга эга эмасман. Шунга қарамай, таклиф қилинаётган сумма яхшигина. Табиийки, жуда юқори эмас, лекин ўзимизнинг чемпионатга мос.
- Файзуллаевнинг кетиши ЦСКАга қандай таъсир қилади?
- Файзуллаев ЦСКА етакчиларидан бири, ҳозир ЦСКАнинг ҳужум чизиғи, юмшоқ қилиб айтганда, жуда зўр эмас. Айни пайтда Файзуллаевнинг кетиши ЦСКА учун катта йўқотиш бўлади. Агар трансферни ёзга қолдириш имкони бўлса, унда Аббосга муносиб ўринбосар топишнинг иложиси бўларди.
Табиийки, Файзуллаевни йўқотишни ҳеч ким истамайди, лекин бошқа томондан бу ўйинчининг карьераси, бу трансферни юқори даражада футбол ўйнайдиган жиддий жамоага ўтиш имконияти, деб қабул қилиш лозим. “Монако”нинг мақсади жиддий бўлса, шунинг ўзи катта ютуқ.
- Нега?
- Бу ёш футболчиларнинг ўзиши учун зарур омил. Бу катта клублар бизнинг чемпионатимиз жамоаларини кузатиб бораётганидан далолат беради. Энг асосийси, бошқалардан ажралиб туриш, яхши ўйин кўрсатиш.
“Пахтакор” тарбияланувчиси бўлган Аббосбек Файзуллаев 2023 йилдан бери ЦСКА шарафини ҳимоя қилиб келмоқда. Бугунги кунда 21 ёшли легионеримиз Марказий Осиёнинг энг қимматбаҳо ўйинчиси ҳисобланади. Унинг трансфер суммаси 6 миллион еврога баҳоланган.
Агар бу жамоада ўйнаганида Файзуллаев учун 15 эмас, 50 миллион евро беришарди!
Файзуллаев Францияга борадими?
Файзуллаевга “Монако” қизиқаётганига муносабат билдирилди!
Фикрлар