Февзи Давлетов: "Кейинги йилдан ўйинларни Термизда ўтказамиз"

“Сурхон” –“Нефтчи” (0:0) ўртасидаги учрашувдан кейин матбуот анжуманида термизликлар бош мураббийи Февзи Давлетов бир қатор саволларга жавоб қайтарди.

- Бугун муҳим баҳс эди. Турнир жадвалида юқорига кўтарилиб, лидерлар қаторига қўшилиш имкониятини назарга тутганда дуранг натижа оғир ўйин бўлди. Адолатли натижа. Вазиятлар бўлди, фойдаланиш керак эди. Бундай имкониятлар доим ҳам бўлавермайди. Рақиб ҳам яхши ҳимояланди. Шу сабабли бу ўйин қийин ўтди.

- “Сурхон” барқарорлик кўрсатмоқда – ўтган мавсум жамоа 6-ўринни эгаллаганди. Клуб раҳбарлари жамоа фаолиятига қанчалик қизиқиш билдирмоқда? Натижа уларни қанчалик қониқтирмоқда?

- Раҳбарият ҳар доим биз билан доимий алоқада. Бугун ҳам гаплашдик. Ўтган йили 6-ўрин бўлганди. Бу мавсумда юқорироқда бўлишга ҳаракат қиламиз. Бизда шу ўйинда ва олдинги ўйинда ҳам хатолар, йўқотишлар бўлди. Самарқандда ҳам кўплаб хатоларга йўл қўйдик. Раҳбарият кўрсатётган ўйинимиздан хурсанд. Мураббий хоҳлаган ўйинни йигитлар намойиш этишмоқда. Қайсидир ўйинларда ҳужумларда бироз бўшашдик, ҳужумчилар билан боғлиқ муаммолар юзага келди. Четлатишлар бизни қийин аҳволга солиб қўйди. Ўйин ташкил этиш бўйича, менимча, бизда ҳаммаси жойида.

- Мен клуб эгаси Бахтиёр Фозиловни назарда тутгандим. Унинг футболга қизиқиши қанчалик? “Сурхон” жамоаси айнан Самарқандда ўйнаётгани жамоа раҳбарларининг шу ердан эканлиги билан боғлиқми?

- Майдонимизда реконструкция ишлари ниҳоясига етмаганлиги учун Самарқандда  ўйнамоқдамиз. Кейинги йилдан тўлиқ ўйинларни Термизда ўтказамиз. Албатта, доим вазиятдан хабардор бўлиб турибмиз.

- Айтмоқчиманки, “Сурхон” жамоасининг асосан Самарқандда экани Бахтиёр Фозилов билан боғлиқ эмасми?

- ПФЛ шундай чора кўрди. Самарқандда ўйнаш юзасидан улардан сўраганингиз маъқул. Бошқа стадион ҳам йўқ эди. Қаерда ҳам ўйнар эдик, ҳаммаси банд эди. Шунинг учун ҳам шундай қарорга келинган.

- Жамоани 7-ўриндалиги сизни қониқтиряптими?

- Натижа бўйича ҳа. Кубок баҳсида бироз омад келмади. Финалга чиқиш имкониятимиз ҳам бор эди, аммо айтганимдек, бироз омад етишмади.

- Суперлига якунланишига 2 тур қолди. Натижалардан қанчалик қониқяпсиз?

- Бизда тартибсиз ўйинлар ҳам бўлди. Шундай ўйинлардан хулоса қилиб бундай вазиятдан чиқиб кета олдик. Клубнинг мақсади ва ўйини бор. Бунинг учун янада кўпроқ ишлаш керак.

- “Сурхон” жамоасида молиявий муаммолар борлиги, маошлар берилмаётгани ҳақида эшитгандик...

- Бизда ойлик маошлардан чўзилиш муаммоси йўқ. Ҳаммаси вақтида. Тўғри битта ойлик маошимиз берилиши керак. Лекин ҳаммаси жойида.