FIFA futzal reytingi. O‘zbekiston 100 ochko yo‘qotib, 10 pog‘ona pastladi

FIFA futzal bo‘yicha terma jamoalarning yangilangan reytingini e’lon qildi. Jahon chempionati bahslari o‘z yakuniga etgandan so‘ng, jadvalda katta o‘zgarishlar sodir bo‘ldi. 

Hususan, O‘zbekiston futzal milliy terma jamoasi mundialdagi o‘ta omadsiz ishtirokdan so‘ng, oz emas, ko‘p emas naqd 100 reyting ochko  yo‘qotib, 10 pog‘ona pastladi. 4 yillikning eng nufuzli musobaqasidan avval terma jamoamiz 11-o‘rinda ketayotgan edi. Ammo yangilangan reytingda 21-o‘rinda joylashgan. Afsuski, butun reytingda faqat bizning terma jamoamiz eng ko‘p ochko va o‘rnini boy bergan.

Osiyo jamoalarini o‘zini hisoblaganda termamiz bir pog‘ona pastga tushib, 4-o‘rinda bormoqda. Garchi Jahon chempionatida qatnashmagan bo‘lsa ham, Yaponiya terma jamoasi vakillari o‘rtoqlik uchrashuvlaridagi g‘alabalar sababli +8 ochko jamg‘arib, qit’ada 1 pog‘ona, dunyo reytingida esa 2 o‘ringa ko‘tarilib oldi va aynan Osiyo qit’asida bizni quvib o‘tdi.   

Markaziy Osiyo mintaqasida hozircha bizga teng keladigani yo‘q. Afg‘oniston umumiy reytingda 30-o‘rinni(qit’ada 6) band etgan bo‘lsa, Tojikiston 42(10), Qirg‘iz Respublikasi 43(11), Turkmaniston 66(17) o‘rinlarda borishmoqda.

Garchi Osiyo qit’asiga kirmasa-da, yana bir yon qo‘shnilarimiz Qozog‘iston terma jamoasi mundialda ancha yaxshi ishtirok etib,  umumiy jadvalda 3 pog‘ona yuqoriga ko‘tarilib oldi. Shuningdek, o‘z hisoblariga qimmatli +77 ochkoni qo‘shib qo‘ydi. Qozog‘iston bu natijalari evaziga jahon reytingida 8-o‘rindan 5-o‘ringa qadar yuqorilashga muvaffaq bo‘ldi.

Ayollar reytingida esa, Farrux Zokirov boshchiligidagi qizlarimiz o‘tgan oy yakunlariga ko‘ra +23 ochko ishlab oldi va +7 o‘ringa ko‘tarilib, umumiy reytingda 18-pog‘onaga joylashdi. Bu Osiyo qit’asida bizni 5-o‘ringa chiqib olishimizga zamin yaratdi.