ФИФАни бошқарган раҳбар жаҳон чемпионатини бойкот қилишни қўллаб-қувватлади

1998-2015 йилларда футбол оламининг энг йирик ташкилоти ФИФА президенти бўлиб фаолият юритган Зепп Блаттер 2026 йилги жаҳон чемпионати АҚШда ўтказилаётгани учун мусобақа бойкот қилинишини очиқ қўллаб-қувватлади.

89 ёшли Блаттернинг баёноти Х ижтимоий тармоғи орқали эълон қилинди ва унда собиқ раҳбар таниқли швейцариялик адвокати Марк Пиетнинг позицияга қўшилишини маълум қилди.

Коррупцияга қарши курашишда фаол ҳисобланган Марк Пиет футбол ишқибозларига жаҳон чемпионати ўйинларини томоша қилиш учун АҚШга бормасликни тавсия қилган. Адвокат фанатларнинг хавфсизлиги ва расмийлар билан юзага келиши мумкин бўлган муаммолар ҳақида огоҳлантирган.

АҚШ 2026 йилги жаҳон чемпионатига Канада ва Мексика билан биргаликда мезбонлик қилади.

Халқаро футбол жамоатчилиги АҚШ президенти Дональд Трампнинг ташқи сиёсати, хусусан, иммиграция ва визаларни назорат қилишдаги кескин чораларидан хавотирда. Хусусан, Трамп маъмурияти декабрь ойида Сенегал ва Кот-д’Ивуар каби Африка мамлакатларидан келаётган мухлисларни визасиз киришдан тўсиб қўйган, шунингдек, Эрон ва Гаити фуқаролари ҳам АҚШга кира олмайди.