Флик "Барса"нинг бир футболчиси норозилиги ортиб бораётганидан хабар топди
«Барселона» бош мураббийи Ханс-Дитер Флик жамоадаги ёш ярим ҳимоячи Марк Бернальнинг норозилиги ортиб бораётганидан хабардор. У машғулотларда ўзини яхши кўрсатмоқда, ўйинларда ҳам муносиб даражада ўйнаган, аммо шунга қарамай, жамоадаги роли ҳали ҳам жуда кам – Берналь деярли ҳар доим майдонга натижа деярли аниқ бўлиб бўлган пайтда туширилмоқда.
El Nacional нашри ёзишича, футболчи бу ҳолатдан тобора кўпроқ норози бўлмоқда: «Норозилик ўсиб бормоқда: Берналь ўзини кўпроқ имкониятларга лойиқ, деб ҳисоблайди. У дарҳол асосий таркиб футболчисига айланишни талаб қилаётгани йўқ, аммо жамоада ҳақиқий рақобат борлигини ҳис қилмоқчи», – дея таъкидланади материалда.
Манбага кўра, Берналь мураккаб вазиятга тушиб қолган, чунки Родри ва Педри ҳозирча асосий таркибда деярли алмаштирилмас футболчилар ҳисобланади. Улар Фликка жуда маъқул бўлган марказий боғламни ташкил этмоқда. Шунга қарамасдан, Берналь ўз меҳнати ва машғулотлардаги иштиёқи билан майдонда кўпроқ ишончга лойиқман, деб ўйламоқда. Мавжуд шароит туфайли 19 ёшли ярим ҳимоячида асабийлик ва ранжиш кайфияти пайдо бўла бошлаган.
«Флик биладики, шундай вазиятни узоқ вақт сақлаб туриш охир-оқибат жамоа ичида муаммога айланиши мумкин», – деб ёзади нашр муаллифлари.
«Барселона» бош мураббийи ёш футболчининг ўсиши тўхтаб қолишини истамайди. Шу боис у Берналь учун кўпроқ ўйин дақиқаларини топиш йўлларини излашга мажбур бўлади.
Фикрлар