Флик Рафиньянинг рамзий жамоага киритилмаганига муносабат билдирди

Бразилия терма жамоаси ва "Барселона" аъзоси Рафинья ФИФА талқинига кўра, 2025 йилнинг рамзий терма жамоасига киритилмади. Ушбу ҳолатга каталонияликлар бош мураббийи Ханс-Дитер Флик изоҳ берди.

"Бу шунчалик қизиқарли. Жамоада Рафиньянинг йўқлигини кўрганда ишониш қийин бўлди. У ўйинга энг катта таъсир кўрсатган футболчилардан бири эди. Рафинья Чемпионлар лигасида энг кўп гол урган ва ассистентлик қилган футболчи эди. Бу унга нисбатан адолатсизлик", – деди Флик.

Маълумот учун, ўтган мавсумда бразилиялик футболчи "кўк-анорранглилар" сафида барча мусобақаларда 57 та учрашувда майдонга тушиб, 34 та гол ва 26 та голли узатма муаллифи бўлди. Шунингдек, ҳужумчи Чемпионлар лигасининг энг яхши тўпурари (13 та гол) ва энг яхши ассистенти (8 та узатма) бўлди. Каталонияликлар билан бирга у Испания чемпионати, Кубоги ва Суперкубогини қўлга киритди.