Фоден: "Биз "Арсенал"га босим ўтказишда давом этишимиз керак"

"Манчестер Сити" ўз майдонида "Кристал Пэлас"ни 3:0 ҳисобида мағлуб этиб, Премьер-лига пешқадами "Арсенал" билан орадаги фарқни икки очкога қисқартирди.

Шу билан бирга, чемпионлик тақдири ҳали ҳам "тўпчилар" қўлида қолмоқда. Лондонликлар сўнгги икки учрашувда ғалаба қозонса, 22 йиллик танаффусдан кейин чемпионликни кафолатлайди.

"Биз фақат "Арсенал"га босим ўтказишда давом этишимиз, уларни доимий тарангликда ушлаб туришимиз керак. Охирги турда турли ҳолатлар юз бериши мумкинлигини яхши биламиз.

Мен бундай вазиятларни кўп бор бошдан кечирганман: ҳаммаси ёмон кетяптидек туюларди, аммо якунда барибир ғалаба қозонар эдик. Шунинг учун биз ўз ишимизни қилишда давом этишимиз лозим", — деди Фил Фоден "Sky Sports"га берган интервьюсида.

"Манчестер Сити" чемпионатнинг сўнгги икки турида "Борнмут" ва "Астон Вилла"га қарши майдонга тушади. Ундан олдин эса жамоа Англия Кубоги финалида "Челси" билан куч синашади.