Формула-1. Антонелли Бельгия Гран-присида ғалаба қозонди, Леклер ва Верстаппен шоҳсупага кўтарилди

“Мерседес” жамоаси ҳайдовчиси Андреа Кими Антонелли Бельгия Гран-приси ғолибига айланди. Иккинчи ўринни Шарль Леклер эгаллаган бўлса, Макс Верстаппен учинчи бўлди.

Пойганинг илк айлана учун етакчиларнинг деярли барчаси “Медиум” шиналарини танлади. Фақат куч қурилмаси элементлари алмаштирилгани учун жарима сабаб 13-ўриндан старт олган Ландо Норрис “Hard” шиналарида пойгани бошлади.

Старт жуда шиддатли кечди. Биринчи бурилишда Антонелли етакчиликни сақлаб қолди, бироқ “Eau Rouge” бурилишига киришда Верстаппен италияликни ортда қолдирди. Аммо курашга Леклер ҳам қўшилди ва Антонелли ўз позициясини қайтариб олгач, нидерландияликни ҳам ортда қолдирди.

Орқароқда Жорж Расселл ва Льюис Хэмилтон олтинчи бурилишда тўқнашиб кетди. “Мерседес” ҳайдовчиси айланишдан сўнг шағалга чиқиб кетди ва натижада трассага хавфсизлик автомобили чиқарилди.

Рестартдан кейин кучли учликдаги тартиб ўзгармади. Хэмилтон эса Оскар Пиастрини ортда қолдирди, бироқ австралиялик тез орада жавоб ҳужуми уюштириб, тўртинчи ўрнини қайтариб олди. Шу пайтда Норрис ҳам олдинга интилишни давом эттириб, тўққизинчи ўрингача кўтарилди.

6-айланада Верстаппен Леклерни қувиб ўтиб, иккинчи ўринга чиқди ва пешқадам Антонеллидан 1,5 сония ортда қолди.

Бир неча айланадан сўнг Пиастри Леклерга ҳужум қилди ва улар ўртасида контакт юз берди. Кейинги айланада Хэмилтон Пиастрини ортда қолдирди. Бироқ стартдаги Расселл билан боғлиқ ҳодиса учун британиялик пойгачи 5 сониялик жарима олди.

Норрис эса етакчилар гуруҳига тобора яқинлашиб, жамоадошидан атиги олти сония ортда қолаётганди.

15-айланага келиб Антонелли Верстаппендан 2,5 сонияга узоқлашди, шу билан бирга Леклер ҳам нидерландияликка ҳужум масофасига етиб келди. Норрис эса ҳар айланада Пиастридан 1,5 сониядан ютиб, фарқни ярмига қисқартирди.

18-айланада Верстаппен боксга кириб, “Hard” шиналарини олди. Орадан ярим айлана ўтмай виртуал хавфсизлик автомобили (VSC) режими эълон қилинди, бироқ ҳеч ким ундан фойдаланиб шиналарини алмаштира олмади.

Шундан сўнг Антонелли ҳам “Ред Булл” томонидан амалга оширилиши мумкин бўлган "undercut"нинг олдини олиш учун боксга йўл олди. У трассага бешинчи бўлиб қайтди ва Верстаппендан 2,5 сониялик устунлигини сақлаб қолди.

20-айланада Норрис Пиастрини ортда қолдириб учинчи ўринга чиқди, аммо австралиялик тез орада позициясини қайтариб олди.

Кўп ўтмай яна VSC режими жорий қилинди ва Леклер, Хэмилтон ҳамда Пиастри биргаликда боксга йўл олди. Леклер трассага Антонеллидан олдинда иккинчи бўлиб қайтди, Пиастри ва Хэмилтон эса Верстаппендан кейин мос равишда бешинчи ва олтинчи ўринларни эгаллади. Хэмилтон жаримадан ташқари йиқилиб тушган механик сабаб ҳам қўшимча вақт йўқотди.

Рестарт айланаси якунида эски шиналарда ҳаракатланаётган Норрисни ортда қолдирган Леклер пешқадамликни қўлга олди. Антонелли эса британияликни қувиб ўтиш учун уч айлана сарфлади ва иккинчи ўринга чиқиб, Леклердан икки сония ортда қолди.

Яна уч айланадан кейин Верстаппен ҳам Норрисни ортда қолдирди. Янги шиналардаги Пиастри эса деярли жамоадоши билан бир хил темпда ҳаракатланаётганди.

31-айланада Норрис боксга кириб, “Медиум” шиналарини олди ва саккизинчи ўринда трассага қайтди. Шу тариқа у Пиастри, Хэмилтон, Хаджар ва Бортолето ортига тушиб қолди. Британияликнинг пит-стопи носозлик сабаб етти сониядан кўпроқ давом этди.

Бу вақтда Антонелли Леклерга ҳужум масофасигача етиб келганди ва 34-айланада биринчи уринишдаёқ пешқадамликни қайтариб олди.

Финишга тўрт айлана қолганида Хэмилтон Пиастрини ортда қолдириб тўртинчи ўринга чиқди. Аммо у Верстаппенга етиб бора олмади. Натижада Андреа Кими Антонелли Бельгия Гран-присида ғалаба қозонди, Шарль Леклер иккинчи, Макс Верстаппен эса учинчи ўринни эгаллади.

Бельгия Гран-приси натижалари

Поз.	Ҳайдовчи	Жамоа	Фарқ	Айланалар
1	Андреа Кими Антонелли	Mercedes-AMG Petronas Formula One Team	—	44
2	Шарл Леклер	Scuderia Ferrari HP	+1.952	44
3	Макс Верстаппен	Oracle Red Bull Racing	+11.586	44
4	Льюис Ҳэмилтон	Scuderia Ferrari HP	+17.245	44
5	Оскар Пиастри	McLaren Mastercard F1 Team	+18.988	44
6	Исак Ҳаджар	Oracle Red Bull Racing	+23.307	44
7	Ландо Норрис	McLaren Mastercard F1 Team	+24.014	44
8	Габриэль Бортолето	Audi Revolut F1 Team	+49.140	44
9	Арвид Линдблад	Visa Cash App Racing Bulls Formula One Team	+50.406	44
10	Франко Колапинто	BWT Alpine Formula One Team	+1:16.037	44
11	Пьер Гасли	BWT Alpine Formula One Team	+1:16.991	44
12	Лиам Лоусон	Visa Cash App Racing Bulls Formula One Team	+1:17.523	44
13	Нико Хюлькенберг	Audi Revolut F1 Team	+1:18.348	44
14	Оливер Берман	TGR Haas F1 Team	+1:34.465	44
15	Алекс Албон	Atlassian Williams F1 Team	+1:44.684	44
16	Карлос Сайнс	Atlassian Williams F1 Team	+1:45.856	44
17	Эстебан Окон	TGR Haas F1 Team	+1:50.925	44
18	Валттери Боттас	Cadillac Formula 1 Team	43	43
19	Фернандо Алонсо	Aston Martin Aramco Formula One Team	42	42

Мусобақани якунлай олмаганлар (DNF):

Ҳайдовчи	Жамоа	Айлана
Лэнс Стролл	Aston Martin Aramco Formula One Team	25
Серхио Перес	Cadillac Formula 1 Team	13
Жорж Рассел	Mercedes-AMG Petronas Formula One Team	0