Формула-1. Антонелли Верстаппендан устун келди. Монакода фаворит кўрилган “Феррари” ишончни оқламади

“Мерседес” ҳайдовчиси Кими Антонелли Монако Гран-присида поул позитсиясини қўлга киритди. Иккинчи ва учинчи ўринларни мос равишда “Феррари” вакили Льюис Хэмилтон ҳамда “Ред Булл” ҳайдовчиси Макс Верстаппен эгаллади.

Биринчи саралаш сегменти (Q1) якунларига кўра, Шарль Леклер 1:13.293 натижа билан энг тезкор бўлди ва Верстаппендан 0,197 сонияга ўзиб кетди. Учинчи натижани Антонелли қайд этиб, етакчидан 0,306 сония ортда қолди. Сегмент тугашига икки дақиқа қолганида сессия қизил байроқ билан тўхтатилди: Габриэль Бортолето ўнинчи бурилишда машинасини деворга уриб юборди, бироқ шунга қарамай энг яхши 16 таликдан жой олиб, кейинги босқичга чиқишни уддалади.

Натижада дастлабки олтилик вакиллари боксда қолишди, протоколнинг қуйи қисмидаги айрим пилотлар эса трекка қайтишди. Саралаш баҳслари Эстебан Окон, Серхио Перес, Оливер Берман, Валттери Боттас, Фернандо Алонсо ва Лэнс Стролл учун шу босқичда якунланди.

Иккинчи сегментда (Q2) Верстаппен сўнгги уринишида 1:12.499 натижа қайд этиб, пешқадамликни қўлга олди. У Антонеллидан 0,205 сонияга тезроқ бўлди. Етакчининг жамоадоши Исак Хаджар учинчи ўринга кўтарилди, Леклер эса фақат тўртинчи бўлиб қолди. Алекс Албон, Карлос Сайнс, Нико Хьюлкенберг, Франко Колапинто, Арвид Линдблад ва Габриэль Бортолето эса финал сегментига йўл ололмади.

Ҳал қилувчи учинчи сегмент (Q3)даги дастлабки уринишлардан сўнг Антонелли ва Верстаппен ўртасидаги фарқ атиги 0,001 сонияни ташкил этди. Учинчи натижани кўрсатган Хэмилтон эса улардан 0,178 сония ортда эди. Шу билан бирга, Леклер муваффақиятсиз уринишдан кейин боксга қайтгани сабабли вақт қайд эта олмади.

Пойга якунига беш дақиқа қолганида монаколик яна тезкор айланасига чиқди ва бошқалар ҳал қилувчи уринишларга тайёрланаётган бир пайтда 1:12.351 натижа билан янги энг яхши вақтни ўрнатди. У Антонеллидан 0,024 сонияга тезроқ бўлди.

Сўнгги уринишларда Верстаппен Леклер натижасидан яна 0,185 сония яхшироқ вақт кўрсатиб, биринчи ўринга чиқди. Бироқ унинг қувончи узоқ давом этмади — Антонелли 1:12.051 натижа қайд этиб, нидерландиялик рақибидан 0,043 сонияга тезроқ бўлди ва поул позитсиясини қўлга киритди. Хэмилтон учинчи ўринга кўтарилиб, жамоадошини ортда қолдирди. Леклер эса сўнгги уринишини девор билан тўқнашув билан якунлади ва тўртинчи ўринда қолди.