Формула-1 тарихидаги энг зўр пойгачилардан бири фаолиятини якунлаши мумкин

41 ёшли британиялик пойгачи, Формула-1'нинг етти карра чемпиони Льюис Хэмилтон Буюк Британия Гран-приси - 2026 мусобақасида ўз фаолиятини якунлашини эълон қилади, бу ҳақда нидерландиялик журналист Люис Деккер хабар берди.

"Силверстоунда Льюис Хэмилтон муҳим янгиликни эълон қилади. Ўйлайманки, Хэмилтон 2026 йилги мавсумдан кейин фаолиятини якунлашини оммага маълум қилади", - дея Деккернинг сўзларини X ижтимоий тармоғидаги Sportskeeda нашри келтирмоқда.

Льюис 2007 йилдан бери Формула-1'да иштирок этиб келмоқда, ўшанда у Британиянинг "Макларен" жамоаси таркибида дебют қилган ва у ерда 2008 йилда биринчи чемпионликни қўлга киритган. 2013 йилдан бери Хэмилтон “Мерседес”ни бошқарган ва у ерда яна олтита чемпионликни қўлга киритган. 2025 йилдан бошлаб британиялик "Феррари" пойгачисига айланди.

Пойгачи автоспортнинг энг ёрқин юлдузларидан бири ҳисобланади. У фаолияти давомида 384 та Гран-прида иштирок этган. Улардан 105 тасида маррага биринчи келган бўлса, 203 марта шоҳсупага кўтарилган. Льюис Формула-1 тарихида энг кўп ғалаба қозонган ҳайдовчи.