FR: Babayan Namanganni "jahannam"ga aylantiryapti...

Sportda nafaqat jismoniy holat, ruhiyatning ham o‘rni bo‘lakcha. Masalan, "Milan" jamoasi kiyadigan liboslar tarixini o‘rgansangiz, uchrashuv davomida raqibga psixologik bosim o‘tkazish maqsadi bilan qizil-qora rang tanlanganiga guvoh bo‘lasiz. Jahon amaliyotida mehmon jamoaning kiyim almashtirish xonasini boshqacha dizaynda tayyorlash tajribasi ham bor. Yana ba’zi stadionlarda yashil maydonga chiqish oldidan o‘qiydigan oxirgi jumlangiz provakatsion bo‘lishi mumkin: "Jahannamga xush kelibsiz!".

Namanganda bunday tajriba bo‘lmasa ham, hech qaysi mehmon "Markaziy"da o‘zini xotirijam his qila olmayapti. "Navbahor" garchi safar o‘yinlarini yutqazayotgan bo‘lsa-da o‘z uyida 100 foizlik natija qayd etyapti (hatto gol o‘tkazgani yo‘q).

Statistikaga e’tibor qilsangiz, "lochinlar" 16 uchrashuvdan beri Namanganda yutqazmayotgani ko‘rinadi (12tasi g‘alaba).

Agar Samvel Babayan kelganidan keyingi davrga qarasak, 21 o‘yinda bitta mag‘lubiyat qayd etilgan (bu ligada eng yaxshi natija).

O‘sha ham o‘tgan mavsumning 5-turida "So‘g‘diyona"dan qabul qilingan edi (Doniyor Abdumannopov uchrashuvga hakam tomonidan qo‘shilgan 2-daqiqa supergol urgani yodingizda bo‘lsa kerak).

Xullas, "Navbahor" Babayan kelganidan keyin muxlislari qarshisida juda murakkab jamoaga aylandi. Namangandagi o‘yin istalgan raqib uchun jiddiy imtihonga aylanyapti. Birinchi davra oxirigacha "Buxoro", "Surxon" va "Olimpik" ham bu sinovdan o‘tishi kerak. Qiziq, "lochinlar"ning bu seriyasi qachongacha cho‘zilar ekan?

Faxriddin Ro‘ziev