ФР: Бабаян Наманганни "жаҳаннам"га айлантиряпти...

Спортда нафақат жисмоний ҳолат, руҳиятнинг ҳам ўрни бўлакча. Масалан, "Милан" жамоаси киядиган либослар тарихини ўргансангиз, учрашув давомида рақибга психологик босим ўтказиш мақсади билан қизил-қора ранг танланганига гувоҳ бўласиз. Жаҳон амалиётида меҳмон жамоанинг кийим алмаштириш хонасини бошқача дизайнда тайёрлаш тажрибаси ҳам бор. Яна баъзи стадионларда яшил майдонга чиқиш олдидан ўқийдиган охирги жумлангиз провакацион бўлиши мумкин: "Жаҳаннамга хуш келибсиз!".

Наманганда бундай тажриба бўлмаса ҳам, ҳеч қайси меҳмон "Марказий"да ўзини хотирижам ҳис қила олмаяпти. "Навбаҳор" гарчи сафар ўйинларини ютқазаётган бўлса-да ўз уйида 100 фоизлик натижа қайд этяпти (ҳатто гол ўтказгани йўқ).

Статистикага эътибор қилсангиз, "лочинлар" 16 учрашувдан бери Наманганда ютқазмаётгани кўринади (12таси ғалаба).

Агар Самвел Бабаян келганидан кейинги даврга қарасак, 21 ўйинда битта мағлубият қайд этилган (бу лигада энг яхши натижа).

Ўша ҳам ўтган мавсумнинг 5-турида "Сўғдиёна"дан қабул қилинган эди (Дониёр Абдуманнопов учрашувга ҳакам томонидан қўшилган 2-дақиқа супергол ургани ёдингизда бўлса керак).

Хуллас, "Навбаҳор" Бабаян келганидан кейин мухлислари қаршисида жуда мураккаб жамоага айланди. Намангандаги ўйин исталган рақиб учун жиддий имтиҳонга айланяпти. Биринчи давра охиригача "Бухоро", "Сурхон" ва "Олимпик" ҳам бу синовдан ўтиши керак. Қизиқ, "лочинлар"нинг бу серияси қачонгача чўзилар экан?

Фахриддин Рўзиев