Футбол бўйича 2030 йилги жаҳон чемпионати финали ўтказиладиган жой эълон қилинди

Марокаш футбол федерацияси президенти Фузи Лекжаа 2030 йилги жаҳон чемпионати финали Касабланка яқинида қурилаётган, 115 минг томошабинга мўлжалланган янги стадионда ўтказилишини маълум қилди, дея хабар бермоқда L’Équipe нашри. 

Маълумотга кўра, Лекжаа бу баёнотини Марокаш ва Испания ўртасида жаҳон чемпионати финалини қабул қилиш ҳуқуқи учун кескин рақобат кетираётган бир пайтда эълон қилган.

Сиёсий партиялар сайловолди кампанияси доирасида 23 сентябрь куни бўлиб ўтадиган парламент сайловлари арафасида Бузника шаҳрида ўтказилган митингда сўзга чиққан Лекжаа, финал баҳси Бенслиман шаҳрида ўтказилишини айтди. Мазкур шаҳар Касабланкадан тахминан 60 километр шарқда жойлашган.

Бенслиманда ҳозирда Ҳасан II номидаги янги стадион қурилмоқда. Лойиҳанинг умумий қиймати қарийб 500 миллион еврога баҳоланмоқда. Лойиҳа режага мувофиқ якунланса, ушбу мажмуа фақат футбол учрашувлари учун мўлжалланган дунёдаги энг йирик стадионга айланиши кутилмоқда, дея ёзади нашр.

Эслатиб ўтамиз, 2030 йилги футбол бўйича жаҳон чемпионати тарихда илк бор бир вақтнинг ўзида уч қитъада ўтказилади. Турнирнинг асосий қисми Марокаш, Испания ва Португалияда бўлиб ўтади. Мундиалнинг 100 йиллик юбилейи муносабати билан дастлабки уч учрашув Жанубий Америкада — Уругвай, Аргентина ва Парагвайда ўтказилиши режалаштирилган.