Futbolchilar qarzdorlik tufayli maydonga chiqishni istamasdi, "Buxoro"ni Superligaga qaytarishga tayyorman - klub ustozi Jamshid Saidovdan muvaffaqiyatsizlikning sabablari haqida

26 ta o‘yinda 14 ochko to‘play olgan “Buxoro” Superligani tark etdi. Klub butun boshli mavsum davomida bor-yo‘g‘i bitta o‘yindagina g‘alaba qozondi xolos.

Mavsumning yarmidan bosh murabbiylikka olib kelingan mahalliy mutaxassis Jamshid Saidov ham har qancha urinmasin baribir muammolar girdobidagi “Buxoro”ni kuchlilar orasida saqlab qola olmadi. U muvaffaqiyatsizlik sabablari yuzasidan sports.uz muxbiri bilan suhbatda bo‘ldi.

-  Bilasizmi, men bosh murabbiy sifatida harakat qildim, qo‘limdan kelganicha ishladim, - deb gap boshladi Saidov. - Futbolchilardan ham maksimal darajada talab qildik. O‘zingiz bilasiz, ko‘proq yoshlar bilan ishladik. 70-80 foiz o‘yinchilarni o‘rinbosarlar jamoamizdan oldik. 3-4 kishi ketib qoldi. Futbolchilarga tajriba etishmadi-da. Bu narsa o‘yinlarimiz davomida bilinib turdi. 

-  Mavsum davomida klubda moliyaviy muammolar borligi haqida eshitib turdik. Bu ham baribir jamoa o‘yiniga va natijalariga ta’sir qilmasdan qolmaydi. Ayni paytda klubning qancha qarzi bor?

-  Ha, ta’siri bor. Ayrim futbolchilar olti oy, yana ayrimlar besh oydan beri maosh olmagan. Shuning uchun ularga motivatsiya berish ham qiyin bo‘ldi. Necha marta o‘yinchilar o‘yinga va mashg‘ulotga chiqmaymiz, deb turib oldi. Mana shunday holatlar ham bo‘ldi. Pul yo‘qligi ta’sir ko‘rsatdi.

-  “Buxoro” futbolchilari qarzdorlik masalasi bo‘yicha PFLga arz qilishayotgani haqida eshityapmiz. Hozir vaziyat qanday?

-  Futbolchilarni shartnomalari bor. Unda ko‘rsatilgan pullarni albatta to‘lash kerak. Bu normal holat. Boshqa klublarda ham shunga o‘xshash vaziyatlar bo‘lib turadi. Shunchaki o‘yinchilar o‘zining ish haqlarini olishi kerak.

-  Statistikaga qarasak, jamoangiz bir qator o‘yinlarning 90-daqiqasidan keyin gol urib mag‘lubiyatdan qutilib qolganini ko‘rish mumkin. Bu esa “Buxoro”ning oxirigacha kurashganini ko‘rsatib turibdi.

-  11 ta durang o‘ynadik va 1 ta g‘alaba bor, xolos. Futbolchilarga oxirigacha kurashgani uchun rahmat. Bizga qaerdadir bitta g‘alaba etmay qoldi. Oxirgi o‘rindaligimizni futbolchilar yaxshi his qilishdi va bundan qutulish uchun astoydil kurashishdi, faqat tarkibimizda yoshlar ko‘p edi.

-  “Buxoro”da ish boshlayotganingizda ham vaziyat murakkab edi va bu siz uchun tavakkalchilik bo‘lgandi...

-  Biz murabbiylarning ishimiz shu – doim tavakkal harakat qilamiz, qo‘limizdan kelganicha ishlaymiz. Bizga hech qachon 1-2-3 yoki 4-o‘rindagi jamoani berishmaydi. Mana qarang, oxirgi o‘rindagi jamoalarda nechtadan murabbiy almashdi-a? “Buxoro”, “Andijon” va “Surxon”da o‘zgarishlar bo‘lib turdi. Tabiiyki, klub pastki pog‘onalardami, unda murabbiylar almashib turadi. Bu bir tomondan yaxshi, yana bir tomondan salbiy bo‘ladi. Faqat bizga biroz omad etmadi. Bir so‘z bilan aytsak, o‘yinchilarimizda tajriba kamlik qildi.

-  Tarkibni kuchaytirish uchun moliyaviy muammo ham ta’sir qildimi?

-  Ha. Jamoamizning federatsiyadan, mehmonxonalardan va yana boshqa joylardan qarzi bor. Buni ham ta’siri bor edi. Yozgi transfer oynasi vaqtida esa yaxshi o‘yinchilarni ro‘yxatdan o‘tkaza olmadik. Chunki PFL yangilarni olishimizga ruxsat bermadi. Shunda ham bir amallab ikki-uchta futbolchini oldik. Ammo ular ham ishonchimizni oqlay olmadi.

-  Mana shunday qiyin paytda ham “Buxoro”ni Superligada saqlab qolishga qanchalik ishonayotgandingiz?

-  Oxirigacha ishongandik. O‘zingiz ko‘rdingiz-ku, mavsum so‘ngigacha kurashdik. Orqaga yo‘l yo‘q edi. Yana shuni ham aytishim kerak, biz barcha o‘yinlarni safarda o‘tkazdik. “Buxoro”ning stadioni ta’mirlanyapti, kelasi yilga tayyor bo‘ladi. O‘z maydonimizda o‘ynay olmaganimiz bizga katta minus bo‘ldi. Shuning uchun chempionatdagi barcha – 26 ta turni mehmonda o‘tkazdik. Buxoroda futbolni yaxshi ko‘rishadi. O‘z uyimizda o‘ynaganimizda baribir ishqibozlar kelardi, qo‘llab-quvvatlashardi. Ularning daldasi ham bizga qo‘l kelardi va balki qiyin vaziyatdan chiqib olgan bo‘lardik ham. Aynan muxlislarimizning qo‘llab-quvvatlashi etishmadi, bizga.

-  Oxirgi paytlarda “Buxoro” klubida pasayish kuzatilayotgandi va bu yil pro-ligaga ravona bo‘ldi. Umuman aytganda, viloyat futboli orqaga ketayotgandik. Buning ildizi nimaga borib taqaladi? Buxoro futboli nima uchun og‘ir holatga tushib qoldi?

-   Futboldan uzoq odamlarning aralashuvlari ham kuzatildi. Har bir inson o‘z ishi bilan shug‘ullanishi kerak. Chumchuq so‘ysa ham qassob so‘ysin deyishadi-ku. Ayrimlari futbolda ishlash oson deb o‘ylashadi. Bu muammolardan biri. Shuningdek, futbolda moliyaviy imkoniyatga ham ko‘p narsa bog‘liq. Chunki buning o‘ziga yarasha chiqimlari bor.

-  “Buxoro” pro-ligaga tushib ketdi. Endi nima qilmoqchisiz?

-  Klubda qolishga va yana Superligaga qaytarishga tayyorman. Hammasini vaqt ko‘rsatadi.

-  Sizga yaqindan yordam bergan Aleksandr Xomyakov ketadimi?

-  Bilmadim, buni ham vaqt ko‘rsatadi.

-  Oxirgi paytlarda Superligada jamoalar soni 16 taga oshilishi mumkinligi haqida gap-so‘zlar yuribdi...

-  16 ta bo‘lsa bizga albatta qulay. Ana shunda jamoamizni qoldirishardi. Baribir ishtirokchilar ko‘proq bo‘lsa, yaxshi futbolchilar chiqaveradi. O‘yinlar ham ko‘payadi. Boshqa chempionatlarga qarasangiz ham kamida 16 ta klublar bor. Ishtirokchilar ko‘paysa, raqobat ham ortadi-da. Ammo jamoalarda moliyaviy barqarorlik bo‘lishi ham kerak. Afsuski, hamma klublarimizda ham holat bunday emas. Tushunamiz, pandemiyaning ham futbolga ta’siri bo‘ldi.

-  “Buxoro”dagi salbiy natijalar murabbiylik faoliyatingizga qanchalik ta’sir qiladi, deb o‘ylaysiz?

-  Bunday vaziyatga birinchi marta duch kelmayapman, bu uchinchisi. Baribir hammasi murabbiy uchun tajriba maktabi bo‘ladi. Har qanday klubga borsangiz ham qandaydir tajriba olasiz. Albatta, Superligada moliyaviy imkoniyat yaxshi bo‘lgan, tajribali o‘yinchilarga ega jamoada ishlash osonroq. Esimda, shunga o‘xshash jamoada 2016 yili ishlaganman. O‘shanda “Buxoro” bilan 4-o‘rinni egallagandik. Viloyat hokimi katta yordam ko‘rsatgandi. Baribir futbolchi pul so‘raydi, agar u xohlaganini bera olmasangiz, unda cho‘ntagingizga qarab o‘yinchi olasiz-da.