Ғалаба қозонган "Олимпик" устози нимадан хафа бўлганини биласизми?

Про лиганинг 5-туридан ўрин олган Тошкентнинг "Олимпик" ҳамда Фарғонанинг "ФарДУ"  жамоалари ўртасидаги ўйин анча қизиқарли ва ҳужумкор руҳда ўтди. Ушбу ўйинда Мирко Еличич бошчилик қилаётган "Олимпик" 2:1 ҳисобида устун келди.

Шуни айтиш лозимки. "Олимпик" учун про лигадаги стартни омадсиз бошланди. Жамоа кетма-кет учта учрашувда имкониятни бой берди. Шундан кейингина жамоа ўзига келишни бошлади. Ўтган турда мусобақада "Локомотив"дан кейинги фаворит ҳисобланган "Арал"нинг майдонида 1:0 ҳисобида ютиб қайтди. Бу сафар эса "ФарДУ" таслим этилди. Демак, "Олимпик" вазиятни тўғрилаётгани кўриниб турибди. 

Жамоа бош мураббийи Мирко Еличич айнан "ФарДУ"га қарши бўлиб ўтган ўйиндан сўнг фикрлари билан ўртоқлашди.

- Бугун мураккаб ўйин бўлишини билардик. Ҳозир Про лигада деярли ҳамма жамоаларнинг даражаси бир хил. Жисмоний жиҳатларга урғу қаратилган курашлар бўлишидан хабардор эдик. Биз 80-дақиқагача ўз ўйинимизни кўрсатишга ҳаракат қилдик. 2:0 дан сўнг йигитлар бўшашишди ва уларнинг ўйинига мослашишимизга тўғри келди. Болалар ёш бўлишларига қарамай, астойдил курашди ва ғалаба қозонди. 

- "Олимпик" биринчи таймда ёрқин ўйин кўрсатди, иккинчи бўлимда эса вақт асосан курашларга сарфланди...

- "ФарДУ" таркибида асосан бўйи узун ва жисмонан кучли футболчилар йиғилган. Улар 2:0 дан кейин шунақа футбол ўйнашга ўтди. Узун пасларни кўп амалга оширишди. Биз ўз футболимизни кўрсатишга уриндик, эпизодларда курашдик, бошқа иложимиз ҳам йўқ эди. Рақиб ҳам кучли томонини кўрсатишга ҳаракат қилади. Бироқ Ўзбекистонда "тоза" ва техник футбол намойиш этишмаётганидан хафаман. Техник футболчилари бўлмагани учун улар узун паслар ва жисмоний тарафга урғу қаратишди. Таркибимизда уч нафар ёши катта футболчи бор, бошқалар академиядан чиққан ва катталар даражасида футбол ўйнамаган. Академиядан чиққан йигитлар бундай курашларга ҳали мослашмаган, бу уларга яхшигина тажриба, дарс бўлмоқда.