Гарначо учун курашга АПЛнинг бошқа бир гранд клуби қўшилди

“Манчестер Юнайтед” ҳужумчи Алехандро Гарначо учун “Тоттенхэм” ҳам даъвогарлик қилмоқда. 
 
Хабарингиз бор, аргентиналик ҳужумчи Рубен Аморим жамоасидаги ўйин амалиётидан норозилиги сабаб, қишки трансферлар ойнасида клубни тарк этиш ҳақида ўйламоқда. Бир неча кун олдин футболчига Лондоннинг “Челси” клуби ҳам қизиқиш билдиргани ҳақида хабарлар тарқалган эди. 
 
“Mail” нашрининг маълумотига кўра, “шпорлар” ҳам Гарначо учун бўлган курашга киришган. Шу билан бирга, улар ҳам жорий мавсум совринлар ютиш учун қишда таркибни кучайтиришмоқчи. Бундан ташқари, “Бавария”дан кетишни хоҳлаган Матис Тель ҳам “Тоттенхэм”нинг таклифини рад этган эди. Шу боис, клуб мутасаддилари трансферлар ойнасининг сўнгги кунларида ҳужумчи олиб келишни мақсад қилиб қўйган. Ҳозирда “қизил иблислар”нинг қанот ҳужумчиси Алехандро энг яхши вариант сифатида кўрилмоқда. 
 
Маълумот ўрнида, 20 ёшли футболчи бу мавсум 35 та беллашувда иштирок этиб, 8 та гол ва 6 та голли узатмага муаллифлик қилган. Унинг клуб билан шартномаси 2028 йилгача мўлжалланган бўлиб, Тransfermarkt порталидаги нархи 50 миллион евро деб баҳоланмоқда.