Гасперини: "Мавсум давомида асоссиз қизил карточка ва пенальтилар бўлди"

Италиянинг “Аталанта” клуби А Сериянинг 35-турида “Монца”ни йирик 4:0 ҳисобида мағлуб этди. Ушбу ғалабага қарамай, жамоа бош мураббийи Жан Пьеро Гасперини чемпионат давомида бир қатор муаммолар ва омадсизликлар жамоанинг натижаларига таъсир қилганини таъкидлади.

Гасперинининг таъкидлашича, Скальвини, Коссуну ва Колашинац каби муҳим футболчиларнинг жароҳат олишига қарамай, ҳимоя чизиғида жиддий муаммолар бўлмаган. Аммо жамоа ҳужум мавсумнинг иккинчи ярмида самарасиз ўйин кўрсатган.

“Иккинчи ярим мавсумда, айниқса ўз майдонимизда, мавсум бошидаги ҳужумдаги уйғунлик етишмаяпти. Бу пасайиш уй ўйинларида очколар йўқотишимизга олиб келди”

Унга кўра, “Аталанта” сафарда деярли доим яхши ўйнаган, аммо ўз уйидаги афзалликдан фойдаланишда қийналган. Шунингдек, Гасперини ҳакамларнинг шубҳали қарорларини ҳам танқид қилди.

“Бизга берилмаган пенальтилар, асоссиз қизил карточкалар бор. Мен ҳаммасини эмас, лекин айрим ҳолатларни айтяпман – бу қарорлар бизни кўпроқ очколардан маҳрум қилди”, – дея қўшимча қилди у.

Ҳозирда “Аталанта” А Серияда 3-ўринни эгаллаб турибди ва “Ювентус”, “Рома” ҳамда “Лацио”дан 5 очколик устунликка эга.

“Концентрацияни йўқотишга ҳаққимиз йўқ – мақсадимизга жуда яқин турибмиз. Энтузиазмни сақлаб қолишимиз керак” – деб сўзини якунлади Жан Пьеро Гасперини.