Гол уролмаётган ҳужумчини учта гранд клуб талашяпти

Италия чемпионатида Туриннинг “Ювентус” жамоаси шарафини ҳимоя қилаётган сербиялик ҳужумчи Душан Влахович январь ойи якунлангунга қадар жамоасини ўзгартириши кутиляпти.

Team Talk журналистлари тарқатаётган хабарларга кўра, машҳур форвардга Европанинг бир неча гранд клублари жиддий қизиқиш билдирмоқда.

Хусусан, Англия Премьер-лигасидан “Челси” ва “Тоттенхэм”, А Сериянинг ўзидан “Милан” 26 ёшни қарши олаётган футболчига шартнома беришга тайёр.

Туринга келгунга қадар “Фиорентина”да ўйнаган Душан Влаховичнинг ўзига кучини Англия чемпионатида синаб кўриш варианти қизиқарли туюлаётгани айтилмоқда.

Жорий мавсум Влахович “Ювентус”да ўзини кўрсата олмаяпти. А Серияда атиги 13 та учрашувда майдонга тушган футболчи бор-йўғи учта тўп киритди. Ҳужумчи охирги тўпини ўтган йилнинг октябрь ойида “Удинезе” дарвозасига киритган. Унинг клуб билан шартномаси 30 июнь куни тугайди.