Гвардиола: ""Бир ҳафтадан сўнг улар билан яна "Этиҳат"да кўришамиз!" (тўлиқ матбуот анжумани)

"Манчестер Сити" бош мураббийи Пеп Гвардиола "Реал"га қарши ўйиндан кейин жамоанинг бошланғич таркиби ва учрашув ҳақида фикр билдирди.

"Йўқ, унчалик катта ўзгаришлар бўлмади. “Ньюкасл”га қарши ўйинда ўзгаришлар кўпроқ эди. Сўнгги учрашувларда бу футболчиларнинг аксарияти майдонга тушган.

Мен қанотлар орқали агрессив ўйнашни истадим, айниқса яккама-якка вазиятларда. Жереми Доку жуда ажойиб ўйнади. Ўнг қанотда эса бироз қийналдик. Орқага очилиб ҳаракат қилишга уриндик ва буни Антуан Семеньо ҳамда Нико О’Райли билан амалга оширдик. Биз кўп марта ҳужумга чиқдик, гол уришни истадик ва нима бўлишини кўришга ҳаракат қилдик.

Аммо улар биринчи бўлимда уч марта имкониятга эга бўлиб, учта гол урди. Биз эса ҳужумнинг охирги қисмигача жуда кўп бордик — бу ҳатто орзудек. Шунинг учун улар тактикани ўзгартириб, ҳимояда беш нафар футболчи билан ўйнай бошлашди ва марказни жуда зич қилиб қўйишди. Айрим қарши ҳужумлар яхши чиқди, баъзилари эса унчалик эмас".

Гвардиола жамоанинг чорак финалга чиқиш имконияти ҳақида ҳам фикр билдирди.

"Ҳозирча имконият катта эмас. Албатта, биз барибир ҳаракат қиламиз".

Мураббий ўйин мазмуни ёмон бўлмаганини таъкидлади.

"Менимча, ўйин ёмон эмасди, анча яхши ўтди. Жереми Докунинг якка ҳаракатлари орқали қанча марта дарвоза чизиғигача етиб борганимизни билмайман. Узун узатмалар ва иккинчи тўпларда, айниқса Антуан Семеньо ва Нико О’Райли орқали ҳам кўп имкониятлар яратдик. Жарима майдони ичида уч-тўрт футболчимиз турган вазиятлар бўлди, лекин ҳатто Тибо Куртуага бирорта жиддий сейв қилиш имконини ҳам беролмадик.

3:0 ҳисобидаги мағлубият 4:0 дан яхшироқ. Барибир бу оғир натижа, бундан қочиб бўлмайди".

Испаниялик мутахассис энди жамоа руҳий ва жисмоний жиҳатдан тикланиши кераклигини айтди.

"Ҳозир энг муҳими — бироз руҳий ва жисмоний тикланиш. Кейин Лондонда "Вест Хэм"га қарши ўйин бор, бу ҳам осон бўлмайди. Премьер-лигада эса ҳали курашда қолмоқдамиз.

Шундан кейин нима бўлишини кўрамиз. Мухлисларимиз албатта “Этихад”га келишади. Футболда эса ҳеч қачон олдиндан аниқ айтиб бўлмайди — балки биз бирор ечим топармиз ёки уларга қарши қандай ўйнаш кераклигини тўғри англармиз".

Гвардиола "Реал"нинг самарадорлигини ҳам алоҳида таъкидлади.

"Улар биринчи голдан кейин унчалик кўп имконият яратмади. Иккинчи марта келиб — иккинчи голни урди. Учинчи марта келиб — учинчи гол. Бу жуда қийин. Уларнинг сифати жуда юқори. Улар жуда зич ҳимояланишди, 11 нафар футболчи ҳимоя қилди. Шунинг учун қарши ҳужумлар доим хавфли". 

Унинг сўзларига кўра, жамоа баъзи вазиятларда яхши ўйнаган.

"Биз яхши комбинациялар билан уч марта дарвозага хавф солдик. Биринчи голда эса ҳимояда тўғри ўйнай олмадик. Шундан кейин қанча марта қанотдан дарвоза чизиғигача етиб бориб, узатмалар қилганимизни санаш қийин. Менимча, ўйин ёмон бўлмади, аммо натижа бутунлай бошқача кўринди.

Албатта, “Реал” доим шундай имкониятга эга: улар тўпни олиб қўйганида тез қарши ҳужумга ўта олади. Улар тўпни ушлаб туришади, кейин эса тез югуришади — бу уларнинг доимий кучли жиҳати.

Менимча, ўйин натижадан кўра яхшироқ бўлди. Аммо натижа мана шу. Энди бир ҳафта вақт бор ва “Этихад”да улар билан яна учрашамиз".