Гвардиола муваффақиятсизликнинг асосий сабабларини очиқлади

"Манчестер Сити" бош мураббийи Хосеп Гвардиола "Арсенал"га қарши баҳсдан сўнг матбуот анжуманида иштирок этди. Испаниялик мутахассис аламли мағлубият ҳақида ўз фикрлари билан ўртоқлашди.

“Мен фақат ўйиннинг сўнгги 20-25 дақиқасидан афсусланаман. Биз 70 дақиқада нима қилган бўлсак, ўйиннинг охиригача ҳам давом эттиришимиз кераклигини унутдик. Бу стадионда "Арсенал"га қарши ўйинни қониқарсиз бошлаш, табиий ҳолатдир. Бу воқеа эса мавсум давомида кўп марта содир бўлди.

Шундай бўлса ҳам учрашувнинг 10-15 дақиқасидан кейин ўйинни ўз назоратимизга олиб, жуда яхши ўйнадик. Ҳисоб тенглашганда эса яхши моментда эдик.

Кейинчалик биз учинчи голдан сўнг нима қилишимиз кераклигини, ҳимояда қандай ҳаракат қилиш кераклигини билмай қолдик. Албатта, бундай ўйнаганимиздан кейин рақиб футболчилари тезкорликни ошириб, ҳисобни йирик кўринишга келтиришди. Сўнгги 10 15 дақиқани инобатга олмасак, биз яхши ўйин ўтказдик.

Биз ортда қолган ўйинларда жуда кўп нарсаларни бериб қўймоқдамиз. Жамоам билан хатоларни таҳлил қилиб, унинг устида жуда қаттиқ ишлаймиз.

Агар сиз бундай муҳим беллашувларда ғалаба қозонмоқчи бўлсангиз, 95-дақиқада ҳам назоратни қўлдан чиқармаслигингиз керак бўлади. Шуни ҳам албатта таъкидлашим зарур, шогирдларим бу тўқнашувда яна 3 та гол уриши мумкин эди" - дея мағлубиятга таъриф бериб ўтди, 54 ёшли мураббий.