Гвардиола яқин йилларда футболга қайтадими?

Хосеп Гвардиола "Манчестер Сити"дан кетганидан кейин таътилга чиқишни режалаштираётганини маълум қилди.

Испаниялик мутахассис аввалроқ "шаҳарликлар" билан хайрлашгач, терма жамоада ишлаш истаги борлигини айтган эди. Бироқ ҳозирча 55 ёшли мураббийнинг аниқ режалари йўқ.

"Ҳозирча келажак учун ҳеч қандай режам йўқ. Фақат дам олиш ва фарзандларим билан ўтказолмаган вақтни қоплашни истайман.

Англия терма жамоасида ишлаш ҳақида сўраяпсизми? Яқин йиллардаги режаларим ҳақида гап кетса, бир сония ҳам футболда ишлаш ҳақида ўйлаб кўрмадим.

Менга дам олиш керак. Мураббийлик фаолиятим давомидаги 17-18 йил ичида юз берган барча нарсани таҳлил қилиб олишим лозим. Кейин нима бўлишини вақт кўрсатади", — деди Гвардиола.

Маълумотларга кўра, "Манчестер Сити"да Пепнинг ўрнини Энцо Мареска эгаллаши кутилмоқда.