Hakim Fuzaylov: "2 ta penaltini urolmadik, ammo hech qisi yo‘q"

“Buxoro” – “Andijon” (1:2) o‘rtasidagi o‘yindan keyingi matbuot anjumaninig ikkinchi qismida buxoroliklar bosh murabbiyi Hakim Fuzaylov qatnashdi.

- Muhim bahsda yutqazdik alamli bo‘ldi. O‘yinni nazoratimizga oldik. Lekin futbolda bunday holat bo‘lib turadi. 2 ta penaltini urolmadik. Ammo hech qisi yo‘q, hali kurash oldinda. Pley-off boshlanyapti. Shunga tayyorgarlik ko‘ramiz.

- Jamoada shtatli penaltichi bormi?

- Bizda shtatli penaltichilarimiz bor edi. Lekin ular maydonda yo‘q edi, masalan Ro‘zim Ahmedov zaxiraga olingandi. Shuning uchun kim o‘ziga ishonsa tepishi kerak edi. Ammo o‘xshamadi, bunday holat futbolda bo‘lib turadi.

- Raqib haqida fikringiz qanday? Bugun jamoa nimaning evaziga yutqazdi?

- Meni o‘ylashimcha bu omad. Taktik tomondan xatolar bo‘lmadi, Raqibning ikkinchi qavatda yaxshi o‘yin ko‘rsatishini bilardik. Lekin birinchi golni shunday holatda qo‘yib yubordik. Kurashlarda qolishmadik, faqat ikkinchi qavatdagi kurashda yutqazib qo‘ydik. Ammo o‘yin bo‘yicha to‘pni nazorat qildik, qaerdadir ustunlikka erishdik, faqat gol urolmadik 2 ta penaltini urolmadik. Omadimiz kelmadi, deb hisoblayman.

- Faoliyatingizda yana shunaqasi bo‘lganmi?

- Ha bo‘lgan. Hatto 3 ta penaltini urolmagan o‘yinlarimiz bo‘lgan. Bu futbol va unda bo‘lib turadi, shunisi bilan qiziq.

- “Turon”ning yutqazgani sizga biroz bo‘lsa-da, yupanch beryaptimi?

- Yo‘q, yo‘q. Biz o‘z o‘yinimizni o‘ylaymiz. To‘g‘ri, “Turon” yutqazdi. Mana, endi pley-off o‘yinlariga o‘tyapmiz. Hammasi o‘shanda hal bo‘ladi. To‘g‘ri, o‘tgan yili “Neftchi ustunlik qilgan. Hozir “Andijon” ustun. Hali hammasi oldinda. Barcha bir-biri bilan o‘ynaydi. Shunda ikkinchi yo‘llanmani olishga harakat qilamiz.

- Lekin ochkolar orasidagi farq kattalashdi...

- Ha, oradagi farq kattalashib ketdi. 8 ta o‘yin qoldi xolos, bunday holatdagi jamoaga albatta engil bo‘ladi. “Andijon” yaxshi holatda.

- Pley-offga qanday tayyorgarlik bo‘ladi?

- Endigi o‘yinlar oson bo‘lmaydi. Biz “Aral Samali” yoki “Zomin” singari emas, balki “Andijon”, “Turon”, “Mash’al”, “Xorazm” kabi jamoalar bilan o‘ynaymiz. Bunday o‘yinlar oson o‘tmaydi. Hech kim “sovg‘a” emas. Hamma jamoa ham ochko yo‘qotishi mumkin. Tayyorlanish kerak.

- Vazifa o‘zgarmadimi?

- Vazifa turibdi, Superligaga olib chiqish. Asosiysi, shu pallada hal qilmoq kerak. Hali hech narsa yo‘qotganimiz yo‘q.

- “Andijon”ga qarshi pressing qilishda jamoa oqsagandek bo‘ldi...

- Hozir tushuntiraman sizga, raqib to‘pni nazorat qilayotganda pressing emas, bosim qilmoq kerak. Shunday holatda gol urdik. Faqat ikkinchi qavatda o‘ynashga imkon berganimizda ulgurmadik. “Andijon”ning bo‘yi baland legionerlari barcha yuqoridagi kurashlarda yutib chiqishdi. O‘rtadagi to‘p nazoratida ham ulgurmadik.

- “Andijon”ning shunday o‘yin ko‘rsatishini kutganmisiz?

- Ha, barchasini bilganmiz. O‘zim “Mash’al” bilan o‘yinni shaxsan stadionda tomosha qildim va o‘yinning yozuvini ham ko‘rsatdik. Jamoa chempionatda bir xil, Milichga yuqoridan uzatma u esa jarima maydoniga uzatadi va kimdir hal qiladi. Burchak to‘plari ham shunday: to‘p Milikga yoki Mamatkazinga tushadi, ular uzatma beradi, to‘pni olgan futbolchi hal qiladi. Boshqa hech qanday kombinatsiya ko‘rmadim.

- Ro‘zim Ahmedovni nega almashtirdingiz?

- Ro‘zimboy ikkinchi bo‘limda charchab qoldi, uni ustiga sariq kartochka olgan edi. Agar yana qo‘pollik qilsa kamchilikda qolishimiz mumkin edi. Shuning uchun almashtirdim. Lekin Songni Ro‘zim bilan juftlikda o‘ynatish rejamizda bor edi.

- Shu ikkala hujumchini boshlang‘ich tarkibda sinab ko‘rsangiz bo‘lmaydimi?

- O‘ylashimcha yaqin vaqtlarda ko‘ramiz. Sekin asta o‘yinni shunday tashkil qilishga tayyorlanamiz. 2 ta sof hujumchilarimiz bor, keyin bugun o‘ynagan Usmonov va Song ular bir xil  “plan”da o‘ynashadi, Ro‘zim bilan Song har xil “planda”  harakatlana olishadi, buning ustila mashg‘ulotlarda ishlaymiz.

“Andijon” matbuot xizmati.