Ҳаким Фузайлов: "Ўтган йили ҳам назорат баҳсларида шу рақибларга ютқазгандик ва якунда "Динамо" билан Суперлигага чиққанмиз"

Мавсумга тайёргалик кўраётган “Бухоро” клуби кеча ўз майдонида назорат баҳсида “Шўртан”га мағлубиятга учради. Шундан кейин бухороликлар устози Ҳаким Фузайлов мазкур ўйин ва кейинги режалар ҳақида гапирди.

- Қисқача тўхталадиган бўлсам, биз ўз ишимизни давом эттиряпмиз. 3 январдан бошланган, салкам бир ойдан ошиқ давом этаётган йиғинимизнинг асосий палласига етиб келяпмиз, ҳозир экватор чизиғидамиз. Тошкентдаги йиғиндан ҳозирги йиғиннинг фарқи шуки, футболчиларга кўплаб юкламалар беряпмиз, улар оғирликни ҳис қилишяпти. Тўғрисини айтсам, ўртоқлик учрашувларидаги натижалар мени унчалик хавотирга солмайди. Ҳа, ютқаздик. Умуман олганда, юкламалардан сўнг, футболчиларимнинг ўйинни олиб бориши мени қониқтиряпти, ёмон эмас, ҳозирги вақт учун. Солиштириш учун айтаман, мен ўтган йили “Динамо” бош мураббийи бўлган вақтимда ҳам худди шу жамоалар билан мавсумолди учрашувлар ўтказгандик. Ўшанда Муборакда ўз дарвозамидан 3 та тўп ўтказиб юборганмиз, ваҳоланки, ўша учрашувда ҳатто 6 та тўп ўтказиб юборишимиз ҳам мумкин эди. Самарқандда ҳам “Шўртан”га 0:2 ҳисобида мағлубиятга учраганмиз.

- Кейин эса нималар бўлганидан яхши хабардорсиз. “Динамо” билан мавсум тугашига 4 тур қолганида Суперлига йўлланмасини нақд қилгандик. Бу билан нима демоқчиман? Бизда ҳаммаси жойида, ишлар режа бўйича кетяпти. Тўғри, ҳатто назорат учрашувларида ҳам мағлубиятга учраш ёқимсиз ҳолат, кўнгилни хира қилади. Аммо бундан хулоса чиқариб, яна мақсад сари жамоани хотиржамлик билан Суперлигага чиқариш учун тайёрлаб борамиз.

- Энди оғир юкламалардан сўнг футболчиларга 2 кунлик дам берамиз, улар 1 ой давомида 9 та учрашув ўтказишди. 9 февралдан яна Тошкент шаҳрида йиғиламиз. У ерда ҳам кўплаб назорат ўйинлари ўтказиш режамизда бор. 12 февралда “Қўқон-1912”, 15 февралда эса “Сурхон” жамоаси билан ҳамда 18 февраль куни “Пахтакор” ўринбосарларига қарши ўйин ўтказиш бўйича келишувга эришганмиз. 21 ёки 22 февралда ҳам албатта рақиб топишга ҳаракат қиламиз. Шундан сўнг, Бухорога қайтамиз”, - дея фикрини якунлади, Ҳаким Қаюмович.