Ҳиндистон терма жамоаси Самарқанддаги Олимпиада ташкилотчилигидан нега норози?

Самарқандда шахмат бўйича 46-Бутунжаҳон Олимпиадаси старт олди. Мусобақа арафасида Ҳиндистон терма жамоаси делегацияси меҳмонхона жойлашуви билан боғлиқ муаммога дуч келган.

Ҳиндистон эркаклар терма жамоасининг капитани — гроссмейстер Сринивас Нараянан мазкур ҳолат юзасидан ижтимоий тармоқда фикр билдирди. У 15 сентябр куни Х ижтимоий тармоғидаги саҳифасида жамоа Самарқанд аэропортига қўнганидан беш соат ўтиб ҳам хоналар ажратилмаганини ёзди.

"ФИДЕ 2026 Олимпиадасида жуда ёмон тажриба. Жамоа Самарқанд аэропортига 5 соат олдин келган. Ҳали ҳам хоналар ажратилмади ва бу қачон амалга оширилиши ҳақида мутлақо аниқлик йўқ", — деб ёзди Нараянан.

Маълумот учун, Сринивас Нараянан — ҳиндистонлик гроссмейстер ва шахмат мутахассиси. У 2026 йилги Олимпиадада Ҳиндистон эркаклар терма жамоасининг капитани сифатида иштирок этмоқда. 
Ҳиндистоннинг Олимпиададаги эркаклар жамоаси таркибига Жаҳон чемпиони Гукеш Домаражжу, Аржун Эригайси, Рамешбабу Прагнанандхаа, Ниҳал Сарин ва Видит Гужрати киритилган.