Ҳусанов атрофида катта ўзгаришлар бўлди!

9 сентябрь, 22:20
0
Футбол

Абдуқодир Ҳусанов учун Франциядаги иккинчи мавсум муҳим аҳамият касб этади. Ўтган чемпионатда асосан ўринбосар вазифасини бажарган 20 ёшли футболчимиз бу гал асосий таркибга кириш учун курашади.

Ҳозирча бошланиши ёмон эмас. Легионеримизнинг ҳимоя чизиғи етакчиси сифатида майдонга тушган учрашувлардаги ўйини мутахассислар томонидан юқори баҳоланди.

“Ланс” олдига жиддий вазифа қўйилган. Жамоа Чемпионлар лигасига йўлланма берадиган юқори ўринлар учун курашиши талаб этилади. Бу мақсадга эришиш учун жамоага янги бош мураббий этиб Уилл Стилл тайёрланди.

Ёзги трансферлар вақтида бу мутахассисга жамоа таркибини ўзига мослаштириш ваколати берилди. “Ланс”да охирги уч ой давомида катта ўзгаришлар бўлди. Ҳозир шу ҳақида.

“Ланс” молиявий бақувват клублар сирасига кирмайди. Шу боис ёзда келганлардан кетганлар кўп бўлди. Асосий эътибор ўйинчиларни қимматроқ сотиб, янги ижрочиларни арзонроқ олиш, катта маош олаётган футболчилардан қутилишга қаратилди. Бироқ ҳар доим ҳам режа амалга ошмади.

Икки катта трансфер барбод бўлди. Нил Эл-Айнаунинг “Монако”га ўтиши ғазнага 14 миллион евро даромад келтирилиши керак эди. 2021 йили “Аугсбург”дан беш миллион еврога харид қилинган Кевин Дансонинг “Рома” белгилаган тиббий кўрикдан ўтолмай ортга қайтгани 25 миллион евролик трансферни барбод қилди.

“Ланс”дан кетганлар:

Лансликларнинг энг йирик чиқиш трансфери Элье Вахи бўлди. “Марсель” ҳужумчи учун 25 миллион евро тлади. Бироқ бу ўйинчи “Ланс”га 30 миллион еврога тушган эди ва савдо фойда келтирди, деб бўлмайди.

Жамоа сотувга қўйган футболчилардан Адам Букса “Мидтьюлланд”га (Дания) 4 миллион, Аянда Сушиба “Верона”га (Италия) 2,5 миллион, Жульен Ле Кардинал “Брест”га (Франция) 1,7 миллион, Лукаш Пореба “Гамбург”га (Германия) 750 миллион еврога сотиб юборилди.

Морган Гилавоги “Санкт-Паули”га (Германия) Салис Абдул Самед “Сандерленд”га (Англия), Янник Пандор “Булонь”га (Франция), Антони Бермон “Анси”га (Франция) ижарага берилди.

Стейн Спирингс, Массадио Ҳайдара, Иброҳим Бальде, Мамаду Камара эркин агент сифатида “Ланс”ни тарк этди.

“Ланс”га келганлар:

Уилл Стилл йўқотишлар ўрнини бир неча янги ўйинчилар эвазига қоплади. Энг қиммат хрид “Бёрнли”дан олинган чап қанот ҳужумчиси Анас Зарурий бўлди. Бу ўйинчи учун лансликлар 9 миллион евро тўлади.

Жамоа ўтган йили ижара асосида ўйнаган Жоаннер Чавесни Бразилиянинг “Баия” клубидан 4,5 миллион еврога тўлиқ трансфер қилди.

“Ланс”га дарвозабон Херве Коффи 2,5 миллион, таянч ярим ҳимоячиси Хамзат Ожедиран 1,5 миллион, марказий ҳимоячи Сиди Бэйн 250 минг еврога тушди. Марказий ҳужумчи Мартин Сатрианонинг ижараси учун “Интер”га бир миллион евро тўланиши келишилди. Тажрибали форвард Мбала Нзола “Фиорентина”дан ижарага олинди.

Эркин агент сифатида “Челси” вакили Маланг Сарр ва “Нант” дарвозабони Денис Петрич “ланс”га бепул қўшилди.

Бугунги кунда Уилл Стилл ихтиёрида 29 нафар футболчи бор. Экспертлар “Ланс” Еврокубокларни эрта тарк этганини инобатга олиб, ички мусобақалар – Лига 1 ва Франция кубогида жамоа таркиби юқори ўринлар учун курашишга қодир, деган хулосани бермоқда.

Абдуқодир Ҳусанов янги мавсумда “Ланс”нинг барча учрашувларида иштирок этиб келмоқда. 20 ёшли марказий ҳимоячи ҳозиргача Франция чемпионатининг учала турида, Конференциялар лигасининг иккита ўйинида майдонга тушди.

“Ланс” Лига 1 доирасидаги навбатдаги учрашувини ФИФА кунлари якунланганидан кейин ўтказади. Лансликлар 15 сентябрда “Лион”ни қабул қилади.

ФИФА кунлари мусобақати билан Ўзбекистон миллий терма жамоасига чақиртирилган Абдуқодир Ҳусанов кичик жароҳат туфайли Францияга қайтариб юборилди. Терма жамоамиз мураббийлар штаби ёш ҳимоячининг саломатлигини ўйлаган ҳолда уни КХДРга қарши учрашувда майдонга туширмади. Қолаверса, 10 сентябрда сафарда Қирғизистон билан бўладиган ўйинда ҳам Ҳусановдан фойдаланмасликка қарор қилинди.

Шомуродов “ДиСу”га қарши!

Машҳур юлдузнинг пешонасига ўзбеклар билан ўйнаш ёзилган экан...