Ҳусанов трансфери юлдузлар билан ишлайдиган машҳур агентга топширилди

Франциянинг бугунги кундаги энг қудратли ва бадавлат клуби – “Пари Сен-Жермен” ушбу мамлакатда ўйнаётган легионеримиз Абдуқодир Ҳусановга биринчилардан бўлиб эътибор қаратган эди.

Париж клуби скаутлари мавсум бошидан бери 20 ёшли ҳимоячининг ўйинини мунтазам кузатиб келади. Абдуқодир айнан ПСЖга қарши учрашувда рақиб юлдузлари Усмон Дембеле, Брэдли Баркола ва Ашраф Ҳакимига нисбатан шиддатли ва қўпол ўйнаган, охир-оқибат хавфли подкати учун майдондан четлатилган бўлса-да, Париж клуби мутасаддиларининг ўзбек футболчисини олиш бўйича фикри ўзгаргани йўқ.

Европанинг нуфузли манбаларидан бири –  news.dayfr.com портали ПСЖ январда Ҳусановни трансфер қилиш бўйича амалий ҳаракатларни бошлаш арафасида турганини маълум қилди.

- “Ланс” марказий ҳимоячиси Абдуқодир Ҳусанов қишки трансферлар ойнаси даврида олинадиган ўйинчилардан бири сифатида ПСЖ нишонида турибди. Парижликлар Ҳусанов трансферини уддалаш вазифасини клубнинг ҳамкори бўлган таниқли футбол агенти Жорже Мендешга юклади.

ПСЖ учун қишки трансферлар даврида қанот ҳужумчиси топиш асосий масала ҳисобланади ва клуб бу йўналиш бўйича иш олиб боришга алоҳида эътибор қаратмоқда. Шу билан бирга, клуб Словакия терма жамоаси ўйинчиси Милан Шкриньярнинг бошқа жамоага ўтишини инобатга олиб, марказий ҳимояга ҳам янги ижрочи олиб келишни мўлжаллаган.

Бу позицияга бир неча ҳафтадан бери “Ланс” вакили Абдуқодир Ҳусанов номзод сифатида ўрганилмоқда. Каттагина маблағга эҳтиёж сезаётган “Ланс” январда бу ҳимоячини қўйиб юбориш эҳтимоли катта.

Таниқли журналист Жанлука Витале бу трансфернинг муҳим жиҳати сифатида музокараларда тажрибали агент Жорже Мендешнинг иштирок этишини кўрсатмоқда. Мендеш Ҳусанов трансферини январда амалга ошириши керак.

ПСЖ бу вазифа уддаланган тақдирда Жорже Мендешга Ҳусановнинг трансфер суммасининг 10 фоизига тенг маблағни гонорар сифатида тўлайди.

Париж клуби раҳбарияти португалиялик футбол агентининг музокара олиб бориш маҳоратига ишонмоқда. Чунки Жорже Мендеш ПСЖга бир неча футболчиларни олиб келган. Айни пайтда жамоада ўйнаётган Витинья, Уррон Заир-Эмери, Гонсалу Рамуш, Жоау Невеш, Брэдли Баркола каби футболчилар Мендеш туфайли ПСЖга келган, - деб ёзмоқда news.dayfr.com портали.

Таъкидлаш жоизки, 20 ёшли легионеримизга Франция, Англия, Испания, Италия ва Германия лигаларидан номдор клублар жиддий қизиқиш билдирмоқда. Улар орасида ПСЖ, “Тоттенхэм”, “Ньюкасл” каби клублар трансферни январда амалга оширмоқчи.

“Ланс” молиявий фэйр-плей талабларини бузмаслик учун тез орада 40 миллион евро миқдорида бюджетга тушум қилиши талаб этилади. Бу маблағни топишнинг энг осон ва қулай усули ўз ўйинчиларини каттароқ суммага сотиб юборишдан иборат.

Бир неча манбаларда қайд этилишича, лансликлар январда етакчи ўйинчиларидан бирини қўйиб юборишига тўғри келади. Шу маънода, клуб Ҳусанов трансферини 30 миллион евро атрофида баҳолаётгани айтилмоқда.  

Ҳусановнинг мухлисларига ёқадиган хабар!

Бош мураббий ғалабадан кейин Ҳусанов ҳақида нималар деди?