Ҳусановга муҳим иш юклатилади
“Манчестер Сити” футболчилари Англия лигаси кубоги, яъни Карабао кубоги ярим финал жавоб учрашувида ўз мухлислари гувоҳлигида “Ньюкасл” жамоаси билан куч синашади.
Рақиб майдонида кечган биринчи баҳсда Хосеп Гвардиола шогирлари 2:0 ҳисобида зафар қучгани боис, “шаҳарликлар”нинг финалга чиқиш имконияти юқорироқ баҳоланмоқда. Бунинг учун “Манчестер Сити”нинг Абдуқодир Ҳусанов бошчилигидаги ҳимоя чизиғи ишончли ўйнаб бериши кифоя.
Мутахассисларнинг таҳлилига кўра, Хосеп Гвардиола муҳим ўйинда қуйидаги футболчилар хизматидан фойдаланиши тахмин қилинмоқда.
Жеймс Траффорд
Жамоа дарвозасини кубок мусобақаларида қўриқлаш вазифаларини бажариш учун Жеймс Траффорд майдонга қайтиши кутилмоқда. “Сити” Жанлуижи Доннарумма келганидан кейин англиялик посбоннинг ўйин вақти сезиларли даражада қисқарди, аммо шунга қарамай, Траффорд жуда профессионал бўлиб қолди ва имконият берилганида ўзини аъло томондан кўрсатмоқда.
Матеуш Нуньеш
Ўнг ҳимоячи позициясини мутлақ ўзиники қилиб олган Матеуш Нуньеш, эҳтимол, “Сити”да мавсумнинг энг яхши ўйинчиси бўлишга асосий номзодлардан биридир. У кетма-кет тўртинчи ўйинини асосий таркибда ўтказиши мумкин. Ярим ҳимоячидан ҳимоячига мослашган бу футболчи янги позициясини ўзлаштиришда давом этмоқда. Балки ўтган сафар у энг яхши ўйин намойиш этмаган бўлиши мумкин, аммо унинг маҳорати шубҳасиз.
Абдуқодир Ҳусанов
Абдуқодир Ҳусанов марказий ҳимоянинг ўнг томонида ўйнайди, чунки ўзбекистонлик футболчи ҳар ҳафта катта ўсишга эришаётганини намойиш қилмоқда. Абдуқодир ўзи ҳақида ОАВдаги салбий фикрларни рад этиб, Йошко Гвардиол ва Рубен Диашнинг нохуш жароҳатларидан кейин таркибга аъло даражада мослашди.
Ўтган якшанба “Тоттенхэм”га қарши жамоанинг иккинчи бўлимдаги бўш ўйинига қарамай, “Манчестер Сити”нинг 45-рақамли ўйинчиси — Шимолий Лондонни боши баланд тарк этиши мумкин бўлган саноқли футболчилардан бири бўлди. У бўлмаганида, “аристократлар” учрашув охирида уч очкони илиб кетарди.
Натан Аке
Марказий ҳимояда Ҳусановнинг шериги тажрибали Натан Аке бўлади. Марк Гехи йўқлигида унинг катта тажрибаси жуда керак бўлиши кутилмоқда. 6-рақамли футболчи 2021 йилда қўлга киритган илк Лига кубоги медалига яна бирини қўшиш имкониятидан руҳланмоқда.
Нико О'Райли
Нико О'Райли одатдаги ярим ҳимоя позициясидан ортга қайтиб, “Ньюкасл”нинг қанотлар орқали яратадиган хавфини бартараф этиш учун ўз ҳимоявий қобилияти ва жисмоний кучидан фойдаланиши кутилмоқда.
Бу 20 ёшли футболчи ярим ҳимояда ёмон ўйнайди, дегани эмас — аксинча. Аммо сўнгги пайтлардаги ҳимоя муаммоларини ҳисобга олганда, “Сити” яна икки голли устунликни бой бермаслиги учун максимал даражада қатъий бўлиши зарур, ва О'Райли айнан қанот ҳимоячиси сифатида энг самарали бўлиши мумкин.
Родри ва Бернарду Силва
Марказда таянч ярим ҳимоячилар жуфти — тажрибали Родри ва Бернарду Силва ҳал қилувчи роль ўйнайди. “Манчестер Сити” ўйинга 2:0 ҳисобидаги устунлик билан кириб келмоқда, шунинг учун темпни назорат қилиш ва тўпни ушлаб туриш “Ньюкасл”нинг ўйинга қайтишига йўл қўймаслик учун жуда муҳим.
Тижани Рейндерс
Икки сардорнинг олдида нидерландиялик Тижани Рейндерс ҳужумкор ярим ҳимоячи позициясини эгаллаши кутилмоқда, чунки унинг энергияси, аниқ паслари ва жарима майдонига кириб боришлари Пеп Гвардиола учун жуда қимматли.
27 ёшли футболчи клубдаги илк мавсумида 12 та самарали ҳаракат амалга оширган бўлса-да, бироз кўзга ташланмай қолмоқда. Асосий таркиб учун кучли рақобат сабаб унинг ўйин вақти чекланган, аммо бу баҳсда катта эҳтимол билан Райан Шерки бўлмаслигини ҳисобга олганда, Тижани ўзини кўрсатиш учун катта имкониятга эга.
Фил Фоден
Ўнг қанотга Фил Фоденнинг қайтиши кутилмоқда. 25 ёшли футболчи ҳали ўз салоҳиятини тўлиқ оча олмагани сир эмас, аммо унинг қобилиятини ҳисобга олсак, Пеп Гвардиола ўз шогирдини узоқ вақт эътиборсиз қолдириши қийин.
Умар Мармуш
Ҳужумда “Ньюкасл”га қарши Эрлинг Холанд ўрнига Умар Мармушга ишонч билдирилиши мумкин, чунки норвегиялик ҳужумчи таркибдаги бошқа барча футболчилардан кўпроқ ўйин ўтказган, бу эса унинг формасига таъсир қилди.
Бу ҳолат шундан ҳам кўринадики, одатда дарвоза олдида шафқатсиз бўлган норвегиялик тўпурар сўнгги етти ўйинда атиги битта гол урди. Шу боис, мисрлик футболчининг бошқача ўйин услуби ва янги кучлари ақлли қарор бўлиши мумкин.
Антуан Семеньо
Ниҳоят, чап қанотда Антуан Семеньо ўз позициясини сақлаб қолиши кутилмоқда. 42-рақамли футболчи клубга қўшилганидан бери бешта ўйинда иштирок этиб, бешта голли узатма берган ажойиб формасини давом эттиришни истайди. Семеньо биринчи ўйинда ҳал қилувчи роль ўйнаган ва яна шундай натижани такрорлашга умид қилмоқда.
Асосий таркиб: Траффорд; Нуньес, Хусанов, Аке, О'Рейли; Родри, Бернарду, Рейндерс; Фоден, Мармуш, Семеньо.
Захирадагилар: Доннарумма, Льюис, Аллейн, Диаш, Айт-Нури, Нико, Нюпан, Черки, Холанд.
“Манчестер Сити” ва “Нькасл” учрашуви 4 февралдан 5 февралга ўтар кечаси, Тошкент вақти билан соат 01:00 да бошланади. Финалга чиққан жамоа ҳал қилувчи баҳсда Лондоннинг “Арсенал” клубига тўқнаш келади.
Фикрлар