Иброҳимхалил Йўлдошев: "Қайрат"да қолмоқчи эдим. Аммо..."

Ўтган йили “Қайрат” таркибида Қозоғистон чемпионлигини қўлга киритган ҳамюртимиз Иброҳимхалил Йўлдошев янги мавсумни Фарғонанинг “Нефтчи” клубида бошлайдиган бўлди. Куни кеча бу хусусида “Нефтчи” расмий хабар ҳам берди. Барча расмиятчилик ҳал бўлгач, Йўлдошев Sports.uz журналистининг саволларига жавоб қайтарди.

- Иброҳимхалил "Нефтчи" клубига ўтишингиз ҳақида олдиндан гап-сўзлар йўқ эмасди ва бу хабар ниҳоят тасдиқланди. Фарғоналиклар илк бор қачон таклиф билан чиқишди ва бу чорловни қабул қилишингизга кўпроқ нима туртки бўлди?

- Тўғрисини айтсам, менга бу таклиф январь ойининг ўрталарида берилди. Вақт жуда кам бўлганлиги учун тезроқ қарор қабул қилишим керак эди. Ундан олдин эса “Қайрат”дан кетиш ниятим йўқ эди. Бу ҳақида ўйламагандим. Аммо айрим сабабларга кўра ўзимни яна Ўзбекистон чемпионатида синашни хоҳладим. Янада ўйин даражамни кўтариб, кейинги йилларга бошқа таклифларни кўриб чиқишга қарор қилдим.

- "Қайрат"да сиз учун барчаси жойида эди. Мамлакат чемпиони бўлдингиз. Лекин у ердан кетишингиз тўғримиди?

-  Ҳа, “Қайрат” клубини ҳам мени кетказиш нияти йўқ эди. Мен ҳам аввалига жамоада қолмоқчи эдим. Лекин Қозоғистон чемпионатига янги қоидалар киритилди ва легионерлар сони қисқартирилди. Шу сабабдан тез ва шошилинч кетишим кераклиги ҳамда тезкорлик билан қабул қилиш керак бўлган қарорга айланди.

- Сир бўлмаса, "Нефтчи" сизга "Қайрат"дагига нисбатан яхшироқ маош таклиф қилдими?

- Ростини айтсам, маош учун эмас, ўйин амалиётимни янада кўпайтириш учун ўтдим. Маош эса сир бўлиб қолсин.

- "Нефтчи"га қандай мақсад билан келдингиз?

- Мақсад ҳар доим битта: қайси жамоага ўтишимдан қатъий назар вазифам ва мақсадим чемпионликни қўлга киритиш. Бунинг учун бор куч ва  ҳиссамни қўшмоқчиман.

- Умуман олганда, "Қайрат"даги бир йиллик фаолиятингиз сизда нимаси билан ёдда қоладиган бўлди?

- “Қайрат” мен учун оиламдек бўлиб қолган жамоа эди. У ердаги шукуҳ мени ўз уйимдек ҳис қилдирди. Бу албатта чемпионлик учун интилиш, жамоавий ўйин, клубда ҳамма бир-бирини ҳурмат қилиши, тартиб-интизом ва чемпионлик ҳисси билан ёдда қолди. Мен учун бу жамоа фаолиятимдаги яна бир катта ютуғим.

- Қачондир "Нефтчи"га ўтишингиз ҳақида ҳеч ўйлаб кўрганмисиз?

- Йўқ, ҳеч қачон ўйламагандим. Лекин Аллоҳ бизга нимани ёзиб қўйганини билмаймиз.

- Сизга Суперлигамиздан яна таклифлар бормиди?

- Тўғрисини айтсам, “Қайрат”дан кетиш ниятим бўлмагани учун бошқа таклифлар бўлдими-йўқми, агентлардан сўрамагандим ҳам. Кетиш ҳақида ўйлаб кўрмаганман. Балки бўлгандир, вақт тиғиз бўлгани учун менга “Нефтчи”нинг таклифи маъқул бўлди.

- Янги клубда қайси рақамни танладингиз?

- 6-рақамни танладим.