Ikkita penalti qaytargan “Real” darvozabonining xaridori ko‘payib ketdi

Ukrainalik golkiper Andrey Lunin ancha paytda Tibo Kurtua soyasida qolib ketdi. Hatto belgiyalik darvozabon og‘ir jarohat olib, uzoq muddatga safdan chiqqanda ham “Qirollik klubi” darvozani qo‘riqlash uchun “Chelsi”dan Kepa Arrisbalagani ijaraga oldi.

Lunin ichki raqobatda Kepadan ustun keldi va hozircha asosiy posbon maqomini egallab turibdi.

Evropa Chempionlar ligasining chorak final javob uchrashuvida Andrey penaltilar seriyasida “Manchester Siti” futbolchilarining ikki zarbasini qaytarib, o‘yin qahramonlaridan bo‘ldi.

Endi Luninning xaridorlari ko‘payib bormoqda. O‘z darvozabonlari o‘yinidan qoniqmayotgan PSJ, “Chelsi” va “Manchester Yunayted” yozda Andreyni transfer qilish bo‘yicha ish boshlashga qaror qilgan.

Luninning “Real” bilan shartnomasi bir yildan keyin yakunlanadi. Uni 20 million evro evaziga transfer qilish mumkin.