Исак "Ливерпуль"даги ҳолати ҳақида: "Ўзимни яхши ҳис қиляпман"

"Ливерпул"нинг ёздаги юлдузли трансфери Александр Исак жамоадаги илк голини урди. У Лига кубоги доирасида "Саутгемптон"га қарши ўйинда (2:1) ҳисобни очди.

Бироқ Арне Слот форвардини фақат биринчи таймда майдонга туширди ва унинг ўрнига Юго Экитикени майдонга туширди.

"ИТV" нашрига берган интервьюсида Исак ўзининг ҳолати ҳақида тўхталиб ўтди:

"Ўзимни яхши ҳис қиляпман, ҳар бир ўйин билан формам яхшиланмоқда. Ҳозир аниқ жавоб бериш қийин, барчаси жисмоний ҳолатим ва ўйинга тайёргарлигимга боғлиқ. Бироқ ўзимни яхши ҳис қиляпман ва жамоага фойда келтира олишимга ишоняпман", — дея жавоб берди "Ньюкасл"нинг собиқ ҳужумчиси.

Эслатиб ўтамиз, мерсисайдликлар 25 ёшли ҳужумчини "Ньюкасл"дан 145 миллион евро эвазига сотиб олган эди.

Маълумот ўрнида, "қизиллар"нинг навбатдаги учрашуви 27 сентябрь куни "Кристал Пэлас"га қарши бўлиб ўтади.