Ишсиз қолган машҳур футболчи АПЛ клублари билан музокара бошлади

“Манчестер Юнайтед”нинг собиқ вингери Жейдон Санчо Премьер-лиганинг икки клуби билан музокара олиб бормоқда.

Санчо ўтган мавсумни “Манчестер Юнайтед”дан ижара асосида “Астон Вилла”да ўтказди. Унинг “Юнайтед” билан шартномаси июнь ойи охирида якунлангани сабабли, ҳозир эркин агент ҳисобланади ва ёзги трансфер ойнаси ёпилганидан кейин ҳам янги клубга ўтиши мумкин.

TEAMtalk маълумотига кўра, сўнгги кунларда Премьер-лиганинг номи ошкор этилмаган икки клуби Санчони трансфер қилиш масаласида мурожаат қилган. Жейдонга Туркия, Саудия Арабистони ва Бирлашган Араб Амирликларидан ҳам қизиқиш бор.

Санчо учун яна бир вариант – Дортмунднинг “Боруссия” клубига қайтиш. 26 ёшли англиялик футболчи ушбу клубда аввал икки марта муваффақиятли фаолият олиб борган.

Эслатиб ўтамиз, “Манчестер Юнайтед” Санчони айнан “Боруссия”дан  2021 йилда 73 миллион фунт стерлинг эвазига сотиб олган эди. Бу трансфер сўнгги йилларда “Олд Траффорд” клуби учун энг омадсиз битимлардан бири бўлди.