Испан клублари “Реал”ни жазолашни талаб қиляпти!

Ла Лигада иштирок этаётган клубларнинг аксарияти ҳакамларни ҳаддан зиёд кўп танқид қилаётган “Реал”га нисбатан жазо санкцияларини қўллашни талаб қилмоқда.

Relevo нашрининг маълум қилишича, Испания Қироллиги футбол федерацияси йиғилишида испан клублари бу масала бўйича ўз қарашларини маълум қилган. Ушбу мажлисда Ла Лига президенти Хавьер Тебас ҳам иштирок этгани айтилмоқда.

Номи маълум қилинмаётган бир неча клуб вакиллари “Реал”нинг ҳакамларга нисбатан танқидларини “босим уюштириш ҳаракати”, деб баҳоламоқда.

Қизиғи шундаки, федерация йиғилишида “Реал” вакиллари иштирок этмаган.

Таъкидлаш жоизки, “Реал” мутасаддилари Испания чемпионати доирасида “Эспаньол”га қарши учрашувда мағлубиятга учраганидан кейин бош ҳакам устидан Испания Қироллиги футбол федерациясига расмий шикоят аризасини йўллаган. Мадридликлар мамлакатда ҳакамлик тизимини тўлиқ янгилашни талаб қилган эди.