Жасур Абдураимов: "Терма жамоамизни ё ўзбек мураббийи бошқарсин ёки топ мураббий!"

Ҳозирги пайтда миллий терма жамоамиз муҳокама мавзусига айланган. Тошкентда КАФА мусобақаси бошланган ва бундан ташқари, бош мураббийлик масаласи кун тартибида турибди.

Тимур Кападзе жойида қолиши керак ёки четдан кучли мутахассис жалб қилиш лозим, каби саволлар, фикрлар кенг муҳокама қилиняпти.

Терма жамоамиз эса КАФАни Уммонга қарши учрашув билан бошлаб дуранг қайд этди.

Жасур Абдураимов эса юоқридаги масалалар бўйича Sports.uzга интервью берди.

- Терма жамоамизнинг Уммонга қарши ўйини хусусида фикрингиз қандай?

- Ўйин менга ёқмади. Уммон яхшироқ ўйин кўрсатди. Замонавий футболга мослашишяпти. Бизда хавфли вазиятлар кам бўлди. Уммон термасини ўйини ёқди. Яхши ҳужумчи бўлса 2-3 та гол уради. Терма жамоамизнинг ўйини ёққани йўқ.

- Ушбу учрашувда таркибда ротацияга қўл урилди. Бу борада нима деган бўлардингиз?

- Таркиб яхши. Ҳа, 5-6 нафар легионерларимиз ўйнашмади, улар етакчиларимиз. Лекин таркибимиз ёмон эмас. Мен ҳам тушунаман, Тимур Кападзега ҳозир руҳий тарафлама ҳам қийин. Янги мураббийлар келиши борасида миш-мишлар бўляпти. Ўзига ҳам, футболчиларга ҳам қийин. Қандай “настрой” қилиш борасида ҳам руҳий томондан осон эмас. Ўзимизда ўйнаяпмиз, ўйнаш керак. Менга нимаси ёқмади? Назоратни қўлга олиш керак, имкониятлар кам бўляпти, кўпроқ олдинга ҳаракат қилиш лозим. Мураббийга ҳозирги вазиятда жуда қийин.

- Сизнингча, терма жамоа бош мураббийлигини маҳаллий мураббийга топшириш керакми ёки хорижликками?

- Бу жуда қийин масала. Ўйлашимча, Тимурга имконият бериш керак. Ўзбек мураббийи сифатида айтишим мумкинки, ўзимизни мураббийга ишониб топшириш керак.

- Пауло Бенту вариантига сизни қарашларингиз керак? Агар четдан мутахассис келса, бизга айнан қандай мураббий зарур

- Келса топ мураббий келсин, Карлуш Кейрушга ўхшаган мураббий. Бизни футболга мослашадиган мураббий бўлиши лозим. Кейруш Уммонни бошқаряпти, бизга ҳам айнан шунга ўхшаш мутахассис келса зўр бўларди. Бенту? Португалияда ишлаган. Балки яхши мураббийдир, аммо вақт кўрсатади. Терма жамоамизни ё ўзбек мураббийи бошқарсин ё топ мураббий! Ўйинлари ва натижалари билан ишини кўрсата олган топ мураббий бўлса яхши, ўртача мураббий керак эмас. Топ мураббий келса биз ҳам нимадир ўрганардик.