Кеча сайтимиз орқали иқтидорли ярим ҳимоячи Жасур Жалолиддиновни ушбу мавсумни “Андижон”да бошлаши ҳақида хабар бергандик.

Москванинг “Локомотив” клубига амалга оширилган омадсиз трансфердан кейин Жалолиддинов маълум вақт “Бунёдкор”да спорт формасини сақлаб турди ва бу пайт давомида ҳаммасини яхшилаб ўйлаб кўрди. Натижада у ўйин амалиёти муҳим эканлигини тушуниб етган ҳолда ўзининг устози – Отабек Ғуломхўжаевнинг таклифини мустақил равишда қабул қилди.

Бугун Жалолиддинов Андижонга етиб келди. Футболчини жамоа қароргоҳида юзлаб мухлислар катта хурсандчилик билан қарши олдилар. Лекин шуни ҳам таъкидлаш керакки, Жалолиддиновни "Андижон"га таклиф қилиш осон кечгани йўқ. Чунки уни ўз сафида кўришни истаган клублар бисёр эди. Аммо бу сафар Ғуломхўжаев анча илдамроқ ҳаракат қилди. Тез орада Жасур билан расман шартнома имзоланади.