"ЖЧ-2026" 3-саралаш босқичининг дастлабки турлар вақти ва стадионлар маълум

Ҳабарингиз бор, сентябрь ойидан ОФК қитъасида Жаҳон чемпионати-2026 3-саралаш босқичи ўйинлари старт олади. Мазкур босқич олдидан дастлабки тур учун беллашувлар ўтадиган стадионлар ва учрашувларнинг бошланиш вақтлари эълон қилинди. 

Ўзбекистон миллий терма жамоаси ҳам мазкур босқичда иштирок этади ва ўз юришини 5 сентябрь кунидан бошлайди. Шу куни Тошкентдаги “Бунёдкор” стадионида КХДР термаси меҳмон бўлади. Қарама-қаршилик пойтахт вақти билан соат 19:00 да старт олади. 

Орадан беш кун ўтиб, 10 сентябрь санасида Бишкекка сафар уюштирамиз. Ўша санада “Долен Омурзаков” номли стадионда мезбон- Қирғиз Республикаси терма жамоаси билан ўзаро ҳисоб-китоб қиламиз. Бу ўйин Тошкент вақти билан соат 20:00 да бошланиши режа қилинган. 

Биз Сречко Катанец бошчилигидаги Ўзбекистон миллий терма жамоасига ҳар иккала ўйинда омад ва зафарлар тилаб қоламиз.