Жеррард "Ливерпуль"нинг ҳозирги ҳолати инқироз эмаслигини таъкидлади

“Ливерпуль”нинг собиқ ярим ҳимоячиси Стивен Жеррард жамоанинг ҳозирги ҳолати инқироз эмаслигини тушунтирди. Клуб кетма-кет учта йирик ҳисобли мағлубиятга учради ва 72 йиллик антирекордни такрорлади.

"Ҳар бир мағлубият билан, айниқса шундай оғир йўқотишлардан сўнг, инқирозга яқинлашасиз. Лекин менга бу сўз ёқмайди, чунки мен учун инқироз — бу клубнинг қайта юқорига чиқиши учун йиллар талаб қилинадиган ҳолат. “Ливерпуль” ҳозир бундай аҳволда деб ўйламайман.

Агар ҳозир январь ёки февраль ойи ўрталарида бўлганида, эҳтимол, “инқироз” дейиш мумкин эди. Ҳозир эса йўқ. Бошқа томондан, жамоада катта муаммолар борлигини инкор қилиш мумкин эмас. Улар даҳшатли даврдан ўтмоқда", — деди Жеррард This is Anfield нашрига берган интервьюсида.

Маълумот учун, мерсисайдликлар АПЛ турнир жадвалида 12-ўринни эгаллаб турибди.