Жокович Римдаги турнирда ғалаба қозониб, Надални ортда қолдирди

Римдаги "Мастерс" турнири ўз якунига етди.

Финал баҳсида сербиялик Новак Жокович аргентиналик ракетка устаси Диего Шварцманни мағлуб этиб, бош совринни ўзиники қилди. Биринчи сетда рақибига муносиб қаршилик кўрсатган Шварцман кейингисида устунликни тажрибали Новакка бой берди. Якуний ҳисоб: 7:5, 6:3.

Бу натижа Жоковичнинг "Мастерс" туркумига кирувчи турнирлардаги 36-титули сифатида тарихга кирди. Унинг рақобатчиси Рафаэль Надаль ҳисобида 35 та шундай соврин мавжуд.

Жаҳоннинг биринчи рақамли ракетка устаси энди 1000 рейтинг очкоси ҳамда 3 854 000 доллар пул мукофотини қўлга киритади.