Кафолат бўлмаса, “Реал”га қайтмайман!

Италия чемпионатида “Комо” жамоаси таркибида порлаётган 21 ёшли аргентиналик ярим ҳимоячи Николас Пас Мадриднинг “Реал” клубига қайтиш масаласида иккиланмоқда.

Бу ҳақда Италиянинг Tuttosport газетаси хабар қилди.

Аввалроқ, “Реал” ўйини очилиб кетган  ўз тарбияланувчисини жорий мавсум тугагач, қайта сотиб олиш ҳуқуқини ишга солган ҳолда жамоага олиб келишни режалаштираётгани ҳақида бир неча бор хабар берилган эди. Бироқ манбага кўра, Пас фақатгина ўйин амалиёти бўйича кафолат олган тақдирдагина “Қироллик клуби”га қайтиш масаласини кўриб чиқиши мумкинлигини таъкидлаяпти.

Ёш футболчи Мадридга борган тақдирда жамоада муҳим роль ўйнашни истамоқда. Шу вазиятдан Миланнинг “Интер” клуби фойдаланиши мумкин, чунки миланликлар Пасга мунтазам ўйин амалиёти таклиф қилишга тайёр.

Жорий мавсумда яримҳимоячи барча турнирларда 29 та ўйинда иштирок этиб, 10 та гол урди ва 6 та голли узатма берди.