Камолиддин Тожиев: "Биз ҳар доим Сергеевга умид қилганмиз"

Ўзбекистон Суперлигасининг 30-туридан ўрин олган “Навбаҳор” – “Пахтакор” (1:1) жамоалари ўртасидаги учрашувдан кейинги матбуот анжуманининг биринчи қисмида меҳмонлар бош мураббийи Камолиддин Тожиев иштирок этиб, ОАВ ходимларининг саволларига жавоб берди. “Шерлар” устози одатдагидек, ўз сўзини ўйин ҳақидаги фикрлари билан бошлади. 

- Қийин баҳс кечишини билардик. “Навбаҳор” билан бу ерда ҳеч қачон осон бўлмаган. Таркибимизда жароҳат олганлар бор. Шу боис Наманганга оптимал таркиб билан келдик, дея олмайман. Аммо майдонга тушган футболчилар бор куч билан ҳаракат қилишди. Афсуски, Башар Ресан қизил карточка олиб, майдонни тарк этди. Ўйинни охиригача тўлиқ ўтказганимизда, балки ютиб кетишимиз ҳам мумкин эди. 

- Ғалаба учун қайси фактор етишмади? 

- Айтиб ўтганимдек, қизил карточка, жароҳат олган футболчилар... Лекин “Навбаҳор” ҳам кучли жамоа. Дуранг ўйнаб, бир очкони қўлга киритдик ва мавсумни 2-ўринда якунладик. Бу ҳам яхши натижа. 

- Жамоани қийин ҳолатда қабул қилиб олгансиз. Иккинчи даврада қўл остингиздагилар умуман бошқача ўйин намойиш этишди, натижа ҳам яхши бўлди. Бунинг сабабларини нимада кўрасиз? 

- Энг биринчи навбатда муҳитни яхшилашга ва футболчиларни бирлаштиришга ҳаракат қилдик. Чунки ҳар қандай жамоада энг асосий нарса бу ички муҳит ҳисобланади. 

- Давралар оралиғидаги трансферлар қанчалик ўзини оқлади? 

- Яхши трансферларни амалга оширдик. Ҳаммасидан қониқдик. Жамоамизга ким қўшилган бўлса, ҳамма қўлдан келганча ёрдам берди. 

- Қишда Игор Сергеев клубни тарк этиши мумкин экан... 

- Биз ҳар доим Сергеевга умид қилганмиз. Унинг ўзи ҳам “Пахтакор”да қолишни хоҳлайди. 

- Бобир Абдихолиқов негадир бугун майдонга тушмади? 

- Қизил карточка сабаб режани ўзгартирдик. Аслида Бобирни майдонга туширишни мақсад қилгандик. 

- Бу йилги мавсумдан қониқдингизми? 

- Қониқдим десам бўлади. Кубокни қўлга киритдик, чемпионатни иккинчи ўринда якунладик. Бу аввало футболчиларнинг меҳнати, шу боис, ҳаммага раҳмат айтаман. Келаси йил яна таркибни кучайтиришга ҳаракат қиламиз. Чунки Осиё чемпионлар Лигасида муносиб иштирок этишимиз лозим. 

- “Пахтакор” жорий мавсум чемпиони “Нефтчи”ни ҳар иккала ўйинда ҳам мағлуб этди. Бироқ “Қўқон-1912”, “Шўртан” клублари билан кутилмаганда дуранг ўйнади. Бунинг сабаби нимада? 

- Кучли жамоаларга қарши алоҳида тайёргарлик шарт эмас. Аммо сиз айтган рақибларга қарши ўйинда иштиёқ бироз панд берди, деб ўйлайман.