Канада Гран-приси: спринт пол-позицияси Расселга насиб этди

Канада Гран-приси доирасидаги спринт саралаш баҳсларида Жорж Рассел муваффақиятли иштирок этиб, “Мерседес”даги жамоадоши Кими Антонеллини ортда қолдирган ҳолда биринчи старт позициясини қўлга киритди.

Мавсумнинг дастлабки тўрт пойгасидан сўнг чемпионатда Антонеллидан 20 очко орқада бораётган британиялик ҳайдовчи ҳал қилувчи саралаш босқичида ҳар икки уринишда ҳам энг яхши вақтни қайд этди. Натижада у Антонеллидан 0,068 сонияга устун келди.

 Иккинчи қаторни “Макларен” жамоаси ҳайдовчилари банд қилди. Ландо Норрис пол-позиция соҳибидан 0,315 сония ортда қолган бўлса, у жамоадоши Оскар Пиастридан 0,019 сония тезроқ ҳаракат қилди.

Кейинги ўринларни “Феррари” ва “Ред Булл” пилотлари эгаллади. Льюис Хэмилтон бешинчи, Шарль Леклер олтинчи, Макс Ферстаппен еттинчи ва Исак Ҳажар саккизинчи натижани кўрсатди.

Испаниялик Алонсо 14-натижани кўрсатган бўлса-да, машинаси трассада қолиб кетгани сабабли кейинги босқичда иштирок эта олмади ва спринт пойгасини 16-ўриндан бошлайди.

Алонсо аварияси вақтида сессия тугашига бир дақиқа 50 сония қолган эди. Тўсиқларни таъмирлаш ишларидан кейин машғулот қайта бошланган бўлса-да, фақат икки нафар ҳайдовчи — Сайнс ва Стролл янги айланишни бошлашга улгурди. Бироқ улар ҳам ўз натижаларини яхшилай олмади.

Шу тариқа, Канада Гран-приси олдидан “Мерседес” ижобий сигнал берди. Энди асосий эътибор спринт пойгаси ва навбатдаги саралаш баҳсларига қаратилган.