Каннавaро: “Ўзбекистонлик футболчилар кучли ва ҳеч қачон таслим бўлмайди”

Ўзбекистон терма жамоаси бош мураббийи Фабио Каннаваро The Guardian нашрига катта интервью берди. Унда мутахассис клублардаги фаолияти, нима учун Ўзбекистонни танлагани ва жамоанинг Жаҳон чемпионатидаги имкониятлари ҳақида гапирди. Қуйида суҳбатни ўқиб чиқишингиз мумкин.

Сиз яқинда Ўзбекистон терма жамоаси бош мураббийи бўлдингиз. Бу қандай содир бўлди?

“Менга Осиёнинг бошқа терма жамоаларидан ҳам таклифлар бўлган, лекин уларни кўриб чиқмаганман. Аммо Ўзбекистондан чақирув келди ва мен бунга эътибор бердим. Чунки у ерда ёш терма жамоа ҳамда кўплаб иқтидорли футболчилар бор. Федерация Ўзбекистондаги академияларга катта эътибор қаратмоқда ва улар яхши футболчиларни тайёрламоқда. Ўзбекистоннинг U-17, U-19, U-23 ёшгача бўлган жамоалари Осиёда деярли ҳар доим ғалаба қозонади. Бу мен учун муҳим эди.”

Сизни қандай кутиб олишди?

“Улар бир ой ичида мен кунга бир-иккита Суперлига доирасидаги ўйинларни кузатганимни қадрлашди. Чунки улар бунга ўрганмаганди. Кўплаб хорижлик мураббийлар бир неча ўйинни кузатиб, сўнг кетишади. Биз у ерда 40 кун турдик, турли жойларга саёҳат қилдик, чунки ишга дарҳол киришмоқчи эдик. Ҳали қилиниш керак бўлган ишлар кўп. Ўзбекистон чемпионатининг шиддати бизни Жаҳон чемпионатида кутиб турган ўйинлардан тубдан фарқ қилади. Бу фарқни камайтиришимиз керак. Маҳаллий футболчилар учун қўшимча йиғинлар ташкил қиламиз ва уларни наfaqat ўйинларда, балки машғулотларда ҳам кузатиб борамиз.”

Мамлакат сизда қандай таассурот қолдирди?

“Мураббийлар штаби билан Тошкентда яшаймиз. Одамлар яхши, жуда самимий. Биз яхши жойлашдик. Самарқандга ҳам бордик, гўзал жой. Ҳамма жойда бўлгани каби, ижобий ва салбий томонлари бор. Ҳозирда асосий салбий нарса ҳавонинг ифлосланиши, у жуда юқори. Лекин меҳнат шароитларидан жуда мамнунмиз. Бизда федерация томонидан тақдим этилган янги спорт маркази бор.”

Ўзбекистон терма жамоаси билан қандай мақсадлар қўйгансиз?

“Жаҳон чемпионати биз ўрганишимиз керак бўлган турнир бўлади. Кейин, олти ой ўтгач, бизда Осиё Кубоги бор ва ушбу мусобақада қандай натижаларга эришишимиз мумкинлигини билиб оламиз. Ҳозирга қадар қилинган ишларни кўздан қочирмоқчи эмасман. Улар терма жамоани Жаҳон чемпионатига олиб чиқишди. Мен улар қилган ишларини Европа футбол маданияти билан яхшилашни хохлайман.”

Жаҳон чемпионатида порлаши мумкин бўлган футболчилар борми?

“Бир нечта футболчилар бор. Уларда иқтидорлилар кўп. Бизда анча ёш жамоа шаклланган. Улар яхшиланиши керак, чунки уларни жисмоний жиҳатдан европаликлар билан солиштириб бўлмайди, лекин ўзбекистонлик футболчилар кучли, курашадиган, ҳеч қачон таслим бўлмайдиган одамлар. Уларга қарши ўйнаш қийин. Биз Уругвай билан ўйнадик. Таркибимизда тўққиз нафар жароҳат олган ўйинчи бор эди ҳам, улар энг яхши ҳолатда бўлмаган. Лекин менинг футболчиларим кучли. Уларга қарши ўйнаш осон эмас ва биз фақат Уругвайга 2:1 ҳисобида мағлуб бўлдик.”

Жаҳон чемпионатининг янги формати ҳақида қандай фикрдасиз?

“Ҳозир ҳамма нарса кенгайтирилган. Бу мени қувонтирди, чунки бу збекистон каби давлатларга имконият беради, бундан 30 йил олдин бунга тасаввур қилмоқ қийин эди. Бошида сизда зерикарли ўйинлар ёки бир томонлама ўйинда кўп голлар бўлиши мумкин, лекин бу ҳамма учун имкониятдир.”

Футболчиларингиз билан қайси тилда гаплашасиз?

“Мен инглиз тилида мулоқот қилишга ҳаракат қиламан. Улар мени тушунишади. Менда таржимон ҳам бор. Ҳозир футболда бу керак. Ўзбек тилини ўрганаяпманми? Бу қийин. Мен биринчи навбатда инглиз тилини яхшилашим керак.”