Канте "Челси"да қолмоқчи

"Челси" ярим ҳимоячиси Н’Голо Канте Лондон клубидаги келажаги ҳақида гапирди. Аввалроқ, 32 ёшли франциялик футболчи ёзда "Арсенал"га ўтишга рози бўлгани, аммо "аристократлар"нинг бўлажак бош мураббийи Маурисио Почеттино уни жамоада олиб қолмоқчи эканлиги ҳақида хабар берилганди.

“Мен “Челси”даги янги лойиҳанинг бир қисми бўлишни хоҳлайман, бу жуда қизиқарли лойиҳа. Афсуски, жорий мавсумда ўзимга муносиб савияни кўрсата олмаяпман. Ёзда қаерда бўлишимни эса билмайман”, - дея Кантенинг сўзларидан иқтибос келтирди Sky Sports.

Маълумот учун, Канте жорий 2022/23 йилги мавсумда “Челси” сафида барча мусобақаларда жами тўққизта ўйинда иштирок этди ва битта голли узатмани амалга оширди. Кантенинг клуб билан амалдаги шартномаси шу йилнинг 30 июнига қадар амал қилади.